 |
| 伊藤博文之死，震驚日本政壇 |
日本前首相安倍晉三遇刺震驚全球，翻看歷史，百多年前另一位日本前首相遇刺，同樣震驚全球！
1909年，日本明治維新鑽石級人物伊藤博文喺中國哈爾濱火車站中槍身亡，享年68歲！
 |
| 日本明治時代首相：伊藤博文 |
行兇者係韓國人安重根。安重根係朝鮮民族主義份子，佢因為唔滿意日本操控朝鮮，所以希望用激進行動懲戒日本帝國主義份子。
伊藤博文喺明治時代長期擔任日本首相，退位後政府任命佢做韓國總監。佢除咗要處理朝鮮內部嘅事務外，主要職責係解決日俄戰爭(1904-05)後日本同俄國喺東亞，特別係中國東北嘅勢力劃分問題。1909年，伊藤到哈爾濱同俄國代表商討日俄勢力分配事宜，當佢落火車檢閱儀仗隊時即遭安重根刺殺。
伊藤博文對韓嘅取態比較溫和，佢反對立刻吞併朝鮮。而安重根希望用激進行動阻止日本人進一步蠶食朝鮮，可惜事情嘅結果同佢嘅設想剛好相反。伊藤嘅死反而令日本國內嘅鷹派抬頭，因為當時日本多人咁樣諗，連溫和嘅伊藤都被韓國激進份子殺死，所以日本絕對唔能夠對朝鮮人心慈手軟，於是政府加快吞併朝鮮嘅步伐。1910年8 月，日本帝國宣佈日韓合併，朝鮮半島到咗二戰之後才能擺脫日本嘅管治，但未幾又分裂成南北。事後想嚟，一連串嘅發展都同伊藤嘅死有間接關係。
世局出現呢種巨變，老積認為安重根喺行刺前未必想到。今次安倍嘅死，不知會唔會為世界局勢帶另一重大轉變呢？
 |
| 韓國人視安重根為民族英雄 |
順帶講小小花生嘢，據聞伊藤博文非常風流，大家唔好比佢豐富嘅學識同岸然嘅外貌欺騙呀！
文：老積
(聲音敘述)
