領導人一定英明神武？當然唔係啦，歷史上唔知幾多瘋瘋癲癲嘅領導人，佢哋治國嘅方式如瘋人院內嘅瘋子。老積今日為大家介紹一個「瘋中之瘋」嘅短命皇朝北齊，而第一期嘅主角就係「癲中之癲」嘅開國皇帝高洋(文宣帝)。
以下嘅事蹟相信教科書鮮有提及，大家唔好錯過啊！
未講到高洋呢個人前，簡單講少少歷史，北齊屬於南北朝後期嘅一個皇朝，當時中國嘅局勢相當混亂，雖然未致於七國咁亂，但都有四國咁亂(見附圖)。咁北齊之前嘅朝代就係東魏，我地嘅主角高洋就係北齊呢個皇朝嘅開國君主，北齊呢個皇朝好短命，由公元550到577，得廿幾年歷史。
 |
| 北齊前身為東魏，北周前身為西魏 |
 |
| 南北朝後期：北齊、北周、陳、後梁 |
睇高洋之前要留意佢爸爸同埋佢哥哥，佢阿爸就係高歡，高歡就係之前講到東魏嘅丞相，其實佢掌握晒東魏嘅大權，軍隊同成個朝廷都係佢控制，名義上佢係丞相，實際上等於皇帝，東魏嘅皇帝只係佢嘅傀儡，情況就如東漢末年嘅曹操。佢死左之後將自己嘅大權傳比高澄，高澄係佢大仔。
高澄大權在握，對東魏嘅皇帝壓迫仲大過高歡，佢其實已經想做皇帝，點知佢唔好彩，比一個奴僕叫蘭京殺死左。高澄嘅死令高氏家族好混亂，朝廷亦好混亂，當時大家都六神無主，唔知點算好，點知高歡第二仔高洋就好冷靜，即刻派軍隊入朝廷平亂，殺左蘭京。佢後嚟繼續壓迫東魏皇帝，結果取而代之，建立左北齊，所以佢係北齊嘅開國君主，歷史上叫佢做文宣帝。(資料2)
高洋呢個人其貌不揚，甚至有啲人覺得佢蠢蠢地，因為佢唔多講嘢，個樣又唔多醒目，同話頭醒尾嘅大哥高澄好唔同，高澄向來都睇佢唔起，但係爸爸高歡就覺得呢個仔聰明伶俐，與眾不同。(資料3)
老積舉一個事例說明高歡點解咁器重高洋。有一次高歡考驗佢啲仔處事嘅能力，整左一啲亂晒籠嘅蠶絲，然後同啲仔講，你地諗辦法整理好啲絲綢。因為啲絲亂晒籠。面對呢個難題，幾個靚仔都唔知點做。當中只有高洋反應最快，佢粒聲唔出突然拎把刀出嚟斬斷啲絲綢。如果老積做老師，或者我係高歡，我會比高洋零分，因為我叫你去治理啲絲，唔係叫你斬斷佢，但係高歡好欣賞高洋當機立斷解決問題嘅做法，仲經常喺人面前讚呢個仔英明果斷添。(資料4)
大家睇到呢度可能會問，車，咁高洋有幾癲姐？大家唔好心急，因為寫得太長，高洋嘅事唔能夠一次講晒，等老積下回再同大家分享。
文：老積
【資料來源】編者案：本工作室替老積先生的文稿補上資料來源，方便有興趣的讀者參考。
1. 《北齊書》卷1〈帝紀第1〉：「神武(案：即高歡)既累世北邊，故習其俗，遂同鮮卑。」
2. 事見《北齊書》卷3〈帝紀第3〉及卷4〈帝紀第4〉。
3. 《北齊書》卷4〈帝紀第4〉：「內雖明敏(指高洋)，貌若不足，世宗(案：即高澄)每嗤之。」
(聲音敘述)
二喬面書
二喬工作室相關資訊：
