北齊後主高緯外號「無愁天子」，但佢一生嘅遭遇剛好同呢個外號相反，可謂莫大嘅諷刺。
高緯親政之後，可以話係內外交困，老積曾講過佢爸爸武成帝高湛係一名人渣，不單手段兇殘，而且極度荒淫，仲信任埋和士開、祖珽呢類小人，佢死咗之後留低個爛攤子比個仔。
更不幸嘅係，後主仲要處理佢阿媽嘅「淫行」！後主嘅生母胡氏，亦係武成帝嘅元配皇后，歷史冇留低佢嘅名字，只係知道佢係大臣胡延之嘅女。(資料1)佢喺南北朝歷史上相當出名，唔係因為賢德出名，而係因為荒淫而廣為人知。武成帝高湛非常荒淫，可能冷落咗呢位元配夫人，胡氏做皇后時已經常同宮廷內嘅宦官眉來眼去，甚至有啲越軌嘅行為，但太監始結有生理嘅缺陷，胡后後嚟竟然搭上武成帝身邊寵臣和士開(又或者係和士開搭上胡后)。(資料2)
武成帝死咗之後，胡后變成胡太后，當時佢只係一個大約30歲未到嘅少婦，可能難掩心中嘅慾火，佢唔顧自己身分，行為越嚟越荒淫。佢經常到宮廷外嘅佛寺參拜，實質係掩飾佢同男人通姦嘅醜行，到佛寺原來係私會佢嘅和尚情人曇獻。太后同和尚私通，佛門中人不禁竊竊私語，佛寺嘅小憎人甚至戲稱曇獻做太上皇。紙包唔住火，呢啲流言好快傳到後主耳中，佢起初都唔喺幾信太后會同人通姦，直到有一次佢去朝見阿媽，見到阿媽身邊有兩個好靚嘅尼姑，後主竟然動咗色心，急召兩個小尼姑入宮，後嚟竟然發現呢兩個尼姑唔係靚女，而係兩塊小鮮肉！(資料3)
後嚟北齊被北周所滅，胡太后仍在人間，據講佢到隋朝開皇年間仍在生，史書話佢喺周、隋時代仍然生活唔檢點，可謂本性難移啦。(資料5)史書冇交代佢喺北周、隋朝生活唔檢點嘅細節，於是好多野史傳聞就將佢嘅淫行穿鑿附會，例如話佢流落青樓之類，由於冇咩根據，老積就唔同大家詳述啦。
家事已夠後主煩，國事就令佢更頭痛，下回同大家再談。
文：老積
1. 《北齊書》卷9〈列傳第1〉：「武成皇后胡氏，安定胡延之女。」
2. 事見《北齊書》卷9〈列傳第1〉；又《北史》卷14〈列傳第2后妃下〉所記略同。
3. 事見《北齊書》卷9〈列傳第1〉及《資治通鑑》卷170〈陳紀4〉。
4. 事見《北齊書》卷9〈列傳第1〉
5. 《北齊書》卷9〈列傳第1〉用「恣行姦穢」形容北齊滅亡之後的胡太后。
沒有留言:
張貼留言