癲佬帝國北齊，總共出過六位皇帝，用劣跡斑斑形容佢哋並不為過。六帝之中，老積認為武成帝高湛係人渣之中嘅人渣！
點解咁講，我用兩個例子說明：
之前老積講過孝昭帝高演，佢係北齊六帝中比較似樣嘅皇帝，可惜佢敵唔過權力嘅誘惑，將自己嘅侄兒高殷殺咗，跟住佢又好內疚(大家可參考返老積之前嘅文章)，佢更禍不單行墮馬身受重傷。高演知道自己命不久矣，其實佢已立咗太子，太子叫高百年，因為年紀細，佢驚佢將來做咗皇帝，高百年會好似高殷咁被其他宗室拉下馬而不得好死。佢唔想慘事重演，於是臨終前決定將皇帝嘅寶座交比九弟高湛。
大家如果記性好，應該記得老積曾經講過有個擦鞋仔，佢極力慫恿文宣帝高洋殺死喺獄中嘅老三同老七。冇錯，呢個擦鞋仔就係高湛。
高湛呢個人性格卑劣，佢好有野心但又冇咩膽，據說孝昭帝高演在位時，已有人勸佢作反，高湛蠢蠢欲動但又唔夠膽起兵。(資料1)點知時來運轉，孝昭帝遇上意外，臨終前將大位交比佢，孝昭帝臨死前寫咗封信對高湛講：「百年(原本太子)係無辜㗎，希望你好好對待佢，唔好學我咁殺咗高殷而內疚一生。」(資料2)
高演將皇位傳比高湛，可謂有眼無珠，亦註定咗高百年悲慘嘅命運！
由於高百年年幼，高湛安排咗一位老師教佢讀書寫字，個老師叫賈德胄。高百年係個小朋友，可能貪得意見過爸爸以前寫過個「勑」字，於是有樣學樣，又寫咗幾個「勑」字(呢個「勑」，又可寫作「敕」)。「勑」係皇帝聖旨咁解，一般人係唔能夠亂用亂寫。賈德胄見到高百年寫咗幾個勑，便如獲至寶將佢封存呈上比皇帝高湛。高湛手執高百年僭越嘅「證據」，相信大家都估到高百年嘅下場啦！
高湛人渣之處係唔單止殺高百年咁簡單，而係叫高百年到大殿對質，再將賈德胄嘅證據驗證核對，再叫手下係大殿上追打高百年，打到高百年差唔多斷氣哀求呢位叔叔皇帝饒命時，才下令斬殺高百年。高百年死後，高湛嘅手下將高百年嘅屍首拋棄喺皇宮嘅池塘中。成件事高湛親自部署，親眼睇住侄兒棄屍，可謂殘忍至極！(資料3)
高湛固然係人渣一名，老積認為那位賈德胄亦可榮登人渣老師嘅大榜！
老積再講另一件事證明高湛有幾人渣。文宣帝高洋嘅皇后名叫李祖娥，史書話佢德行同美貌並重，(資料4)連癲佬皇帝高洋終其一生都對佢好好。
自古紅顏多薄命，李皇后可說係一生坎坷，做皇后時侍奉癲佬高洋已經唔係易事，高洋死咗，大仔高殷被叔父所廢，後嚟更比孝昭帝高演所殺。夠慘未？答案係未，呢個只係佢悲劇嘅開始。
到咗高湛做皇帝，呢個人渣皇帝唔單止殘忍，做係色中餓鬼，佢垂涎嫂嫂嘅美色，要脅李后就範，李后唔肯，高湛就咁講：「你唔肯同我行埋，我就殺咗你個仔。」原來高洋同李后仲有個仔叫高紹德，李后深愛自己兒子，唔想自己個仔受傷害，迫不得已之下只好就範。更不幸係李后竟然有咗身孕，佢為免尷尬，唔肯見兒子，但高紹德喺外面收到風，知道媽媽大咗肚，於是發嬲鬧阿媽，史書嘅記錄非常生動，原文係咁講：「姊姊腹大，故不見兒。」北齊人習慣叫阿媽做「姊姊」，史書用「姊姊腹大」，可以話非常傳神。李后聽到乖仔咁講，當然非常羞愧。後嚟佢替高湛生咗個女，唔知係唔係產後抑鬱，竟然唔理個初生BB，最後個BB死咗。高湛知道之後好嬲，佢對李后講：「你殺咗我個女，我就殺返你個仔。」於是捉咗高紹德，喺李后面前殺咗佢，李后當然傷心欲絕，但高湛怒氣未消，對李后拳打腳踢，然後搵人掟咗佢入護城河。李后竟然冇死到，後嚟出家做尼姑。李后仲幾長命添，北齊滅亡之後佢去咗北周，直到隋朝建立先死。經歷咁多不幸卻享高壽，真係唔知幸運定係不幸！(資料5)
從以上兩件事，大家可判斷一吓高湛係唔係人渣中嘅極品呢？
最後順帶講一件騎呢事。高湛做咗幾年皇帝，天空出現彗星，現代嘅人見到彗星當然高興，因為係難得嘅天文現象，但古人就認為係凶兆，於是高湛走去問太史，太史就話：「天空出現彗星，表示除舊布新，應該會有新皇帝。」高湛一聽之下大驚，諗起自己做咁多陰騭事，會唔會比人推翻呢？呢個時候有個擦鞋仔獻計同高湛講，只要你傳位比太子而自己做太上皇，咪應驗咗易主之事咯。高湛心想冇錯，於是立即傳位比太子高緯，自己做太上皇。(資料6)不過閻王要你三更死，點避都係冇用，原本健康嘅高湛，做咗唔夠大半年(編案：高湛做了二年多太上皇才駕崩，應是老積先生錯記)嘅太上皇就一命嗚呼！
文：老積
【資料來源】編者案：本工作室替老積先生的文稿補上資料來源，方便有興趣的讀者參考。
1. 事見《資治通鑑》卷168〈陳紀2〉。
2. 《北齊書》卷12〈列傳4〉及《資治通鑑》卷168〈陳紀2〉。原文：「百年無罪，汝可以樂處置之，勿效前人也。」
3. 《北齊書》卷12〈列傳4〉：「遂斬之，棄諸池，池水盡赤，(武成帝)於後園親看埋之。」可見殺百年之事高湛親自參與。
4. 史稱其「容德甚美」，見《北齊書》卷9〈列傳1〉。
5. 事見《北齊書》卷9〈列傳1〉。
6. 事見《北齊書》卷7〈帝紀7〉及《資治通鑑》卷169〈陳紀3〉。
(聲音敘述)
沒有留言:
張貼留言