老積今集同大家講講北齊嘅末代皇帝後主高緯，其實嚴格嚟講佢係北齊尾二嘅皇帝，因為佢之後仲傳位咗比佢個仔高恒，但呢個高恒只係一個細蚊仔，而且在位時間甚短，所以好多人都當咗高緯係末代皇帝。關於高恒嘅事，老積會喺之後再作交代。
北齊後主高緯就係我之前講過嘅「人渣皇帝」高湛(武成帝)嘅太子，高湛做做吓皇帝傳位比高緯，自己做太上皇。呢度有啲嘢要更正，上次老積記錯咗，武成帝高湛做咗兩年多太上皇，而唔係做咗大半年太上皇就一命嗚呼。
後主高緯係一個呆瓜，仲天生膽怯。佢唔多鍾意講嘢，除咗寵信嘅人之外，唔多鍾意同人溝通。仲有佢好怕同人有眼神接觸，有人望望佢，佢就會發脾氣，做咗皇帝後，就算大臣啟奏政事都唔准大臣望住佢，於是班大臣匆匆啟奏完就戰戰兢兢咁離開，君臣之間甚少交流。(資料1)
呢個人喜歡自作聰明，例如有人舉薦宗室高思好做大將軍，佢話高思好會作反，後嚟高思好果然作反，身邊嘅擦鞋仔當然大讚皇上英明，佢就以為自己算無遺策。(資料2)
當時嘅社會流行無愁樂曲，估計係歌頌上流社會生活無憂嘅流行曲，高緯好鍾意呢類樂曲，經常拎住個琵琶自彈自唱，身邊幾百個侍從宮女就會一齊和唱，當時嘅人稱呼佢做「無愁天子」。(資料3)
高緯有好多怪癖，唔少同動物有關，例如佢喜歡睇馬匹交配，事前佢會叫手下準備青色嘅帳蓬，然後入帳蓬一邊享用美酒美食，一邊欣賞。佢又鍾意喺宮庭蓄養馬、狗、雞、鷹等動物，而且會封賞佢寵愛嘅牲畜，皇宮內有甚麼甚麼「赤彪儀同」、「逍遙郎君」，全都係狗馬嘅封號。佢馴養鷹嘅手法非常殘忍，就係叫手下將活生生嘅狗肉切下餵比啲鷹食，可憐嘅狗狗捱唔過幾日就會死！(資料4)
高緯另一個怪癖係鍾意將啲宮殿拆完又起，起完又拆。例如佢喺晉陽興建十二院，建築非常壯麗，內部裝飾極盡奢華，初時佢非常喜愛，但冇幾耐就生厭，於是又下令拆卸重建，連續好幾次都係咁，搞到班工匠苦不堪言。(資料5)起完又拆，拆完又起，或者呢個係後主高緯增加北齊GDP嘅天才想法都未定！
佢又鍾意做一啲唔緊要嘅事，心血來潮就一定要做到，例如有一次佢忽然想要好多蠍子，於是宮中總動員，一晚之中為佢搜索到三升蠍子。當佢心血來潮要得到某樣東西嘅時候，就係佢班下屬聚斂嘅好機會，因為班奴才可以利用呢個機會搜刮民脂民膏。(資料6)
高緯嘅怪癖一籮籮，佢可能覺得做皇帝過奢華生活唔夠過癮，於是反璞歸真學做乞衣，實行體驗窮人嘅生活。佢喺宮中華林園設立「貧窮村舍」，親自著上破爛衣服扮乞衣。除咗做乞衣，佢又鍾意做小販，佢喺宮中設立市集，自己化身為小販賣吓嘢。(資料7)唔知佢會唔會叫手下班奴才扮食環或城管，試吓「走鬼」嘅滋味呢？
佢又試過命令人建造北周城池嘅模型，吩咐一班手下著黑衫扮北周兵。(資料8)老積喺度解釋吓，北周係北齊嘅死敵，佢咃嘅士兵都著黑衣。後主會親自帶領班太監仔去攻打班黑衣人，有時皇帝會動起真火，拎起弓箭開弓射人。(資料9)至於有冇死傷，史書就冇記載啦。
今集講得太長啦，關於呢位無愁天子，老積仲有嘢同大家分享，下回再見啦！
文：老積
【資料來源】編者案：本工作室替老積先生的文稿補上資料來源，方便有興趣的讀者參考。
1. 《北齊書》卷8〈帝紀第8〉及《資治通鑑》卷172〈陳紀6〉。
2. 同上。
3. 同上。
4. 同上。
5. 同上。
6. 同上。
7.《北史》〈本紀第8ž齊本紀下〉。
8. 《北齊書》：「使人衣黑衣為羌兵。」(卷8〈帝紀第8〉)。《資治通鑑》：「使人衣黑衣攻之。」(卷172〈陳紀6〉)，並無「為羌兵」數字。《通鑑》胡三省注：「黑衣者，象周之戎衣。」案：北周為北齊死敵，且舉國尚黑，後主吩咐手下穿黑衣肯定是扮演北周兵而非羌兵，胡注的解釋非常正確。
9. 《北齊書》卷8〈帝紀第8〉及《資治通鑑》卷172〈陳紀6〉。
(聲音敘述)
二喬面書
二喬工作室相關資訊：
沒有留言:
張貼留言