成日話父母愛子「無微不至」，呢啲套語我地成日聽到，但現實情況係唔係咁呢？有冇親生母親會咀咒個仔快啲死呢？
高演係高歡嘅兒子之中比較賢能、比較似樣嘅一個人，佢好鍾意同佢大佬高洋頂頸，例如勸佢唔好飲酒，唔好濫殺無辜。高洋幾次想殺佢，但佢又真係好嘢，每一次都逢兇化吉。
癲佬高洋做左十年皇帝就暴斃，皇位傳左比太子高殷，就係之前老積提過嘅悲劇人物。高洋死前安排咗老六高演同老九高湛輔政，高湛就係之前講過叫高洋唔好放虎歸山，高洋因此殺左老三同老七個位人兄啦。除左呢兩位親王，仲有一啲漢人官員，例如名臣楊愔輔政。
高殷繼承爸爸皇位時，由於只得15、6歲，大概係香港一個中三、四嘅學生，國家大事處理唔到，惟有靠輔政大臣。當時二位高氏親王同漢臣之間有激烈嘅鬥爭，結果二王取得勝利，佢地殺左楊愔等人，後嚟索性廢左高殷，喺婁太后嘅批准下由高演做皇帝，歷史上叫佢做孝昭帝。(資料1)
高演係高洋做皇帝時滿口仁義，一臉正氣，結果仍敵唔過權力嘅誘惑，奪權登上帝座。不過講返句公道話，佢做皇帝時都做咗啲好事，例如解除左高洋一啲嘅苛政，對下屬同百姓亦較寬容，佢算係北齊六帝中最好嘅一個皇帝。
高演登上帝位時，曾應承生母婁太后善待侄兒高殷，佢封左高殷做濟南王。後嚟高演身邊有位擦鞋仔對高演獻媚，佢話觀測到首都鄴城有天子嘅紫氣，勸佢殺左高殷，高殷就因為擦鞋仔呢番話而一命嗚呼！
高殷一出世就對住禽獸父親，長大後又比叔父威迫，十幾歲人冇過過一日快活嘅日子，真係非常可憐！(資料2)
高演一直隱瞞高殷嘅死，唔比阿媽婁太后知道。後嚟高演有一次出外打獵，不慎墮馬受重傷，肋骨斷裂，要長時間臥床，佢仲經常有幻覺，見到侄兒高殷嚟索命。有一日，婁太后嚟探佢，原來婁太后並唔係關心個仔，而係佢唔知係邊度收到風，知道高演殺左佢個乖孫。佢見到高演，劈頭一句就問高殷去左邊，高演內心有愧，默不作聲，婁太后三次問佢佢都唔敢答，呢個時候太后爆左句金句：「死其宜矣」，換作廣東話即係「抵你死啦！」(資料3)
唔知係唔係婁太后嘅咀咒靈驗，過左冇幾耐，北齊孝昭帝高演就離開人世。高演臨死前嘅情況都幾慘，據史書講佢喺床上嘅枕頭邊叩頭哀求上天原諒！(資料4)
大家覺得婁太后咁樣咒個仔啱唔啱呢？老積就覺得高殷固之然係悲劇人物、婁太后、高演又何嘗唔係？呢個可能就係專制王朝嘅特色！
文：老積
【資料來源】編者案：本工作室替老積先生的文稿補上資料來源，方便有興趣的讀者參考。
1. 事見《資治通鑑》卷168〈陳紀2〉。
2. 事見《北齊書》卷6〈帝紀第6〉。
3. 《北齊書》卷6〈帝紀第6〉：「太后怒曰：殺去耶，不用吾言，死其宜矣。」大意是你殺了高殷，不聽我的話好好保護侄兒，你死了是活該。
4. 事見《北齊書》卷6〈帝紀第6〉。
(聲音敘述)
二喬面書
二喬工作室相關資訊：
沒有留言:
張貼留言