日本前首相安倍晉三被殺，事件轟動全球。安倍嘅死勢必影響日本政府施政方針，甚至會影響全球嘅政治格局。歷史往往有好多巧合之處，1000多年前，一位唐朝丞相之死，亦深深影響當時嘅政治格局。
公元815年(唐憲宗元和10年)，宰相武元衡於上朝時遇刺身亡(武元衡時任門下侍郎、同平章事，唐制中書、尚書、門下三省首長視為宰相)，同行嘅御史中丞裴度亦身受重傷。
刺殺武元衡嘅人絕非瘋子，更唔係因為母親捐獻大量金錢比宗教組織而報復！殺人者早有預謀，佢係一位職業殺手，受藩鎮(唐朝嘅軍閥)所託嚟拔取武元衡呢口眼中釘！
大家都應該聽過安史之亂後，唐朝出現藩鎮割據嘅情況，朝廷對藩鎮應剿應撫舉棋不定，於是令到藩鎮越嚟越膽大妄位。
憲宗皇帝即位，決意清除藩鎮呢個大毒瘤，佢喺813年(元和8年)任命鷹派人物武元衡為相。武元衡力主削藩，佢「事不避難」，決定對當時勢力最大嘅三個藩鎮淮西、成德、淄青用兵。朝廷大軍首先向淮西節度使吳元濟用兵，吳元濟向成德同淄青求救。淄青節度使李師道認為成件事都係武元衡搞出嚟，佢認為武元衡一死，朝廷就會退兵，於是心生一計，派殺手到長安解決武元衡。
武元衡嘅死令唔少唐朝大臣嚇破膽，但憲宗皇帝並無屈服，佢喺震驚之餘仍堅持主戰，並立即任用負傷嘅裴度做宰相。裴度繼續武元衡主戰嘅路線，委任名將李愬領軍進攻淮西，並於817年(元和12年)攻陷淮西根據地蔡州；819年，再平定淄青嘅李師道。藩鎮希望用刺殺宰相嘅血腥手段力挽狂瀾，結果佢哋如意算盤打唔響，仲一敗塗地添！
武元衡家世顯赫，佢係武則天嘅曾侄孫。武元衡擅寫詩，同大詩人白居易老友，詩寫得唔錯(當然同白有段距離)；仲有，相傳佢係一位帥哥，唔少唐朝美女係佢粉絲，據講曾留低唔少風流韻事！
 |
| 裴度 |
文：老積
(聲音敘述)
更多二喬資訊：
二喬面書
二喬工作室相關資訊：
沒有留言:
張貼留言