1809年，俄國人從瑞典手上奪取芬蘭。俄國人冇將芬蘭併入版圖，而係建立一個芬蘭大公國，大公國嘅領袖名義上係俄國沙皇，但當時俄皇亞歷山大一世給與芬蘭人頗多自治權，俄國亦尊重芬蘭人嘅宗教信仰及容許當地人使用芬蘭語或瑞典語，所以雙方嘅關係尚算融洽。
1880年代，俄國沙皇亞歷山大三世喺芬蘭推行俄國化運動，佢收緊芬蘭嘅自治權，又規定政府部門必須採用俄語，呢啲舉動令芬蘭人非常反感，於是芬蘭人要求獨立嘅呼聲日漸高漲。
1902年，俄國喺芬蘭強行徵兵，引發當地人不滿，亦令到獨立運動趨於激進化。1904年，俄國駐芬蘭總督被激進嘅芬獨份子暗殺，俄國正想大規模鎮壓，但剛巧爆發日俄戰爭(1904-05)，俄人無暇兼顧芬蘭事務，於是作出一啲讓步。到咗1908年，俄國再次收緊芬蘭自治權，雙方關係已到水火不容嘅程度。
 |
| 芬蘭民族主義份子槍殺俄國駐芬蘭總督 |
1914年第一次世界大戰，尋求獨立嘅芬蘭人更加積極。1917年，俄國先爆發二月革命，沙皇被推翻，芬蘭人乘機驅趕俄國駐芬蘭官員，並廢取咗俄國人嘅專制惡法。當時俄國新政府對芬蘭單方面嘅做法表示不滿，但俄國政府正忙於對德作戰，根本無能力兼顧芬蘭事務。1917年底，俄國爆發十月革命，列寧領導嘅布爾什維克政權上台，呢個即係後嚟稱之為蘇聯嘅新政權。
芬蘭人喺俄國立立亂之際，喺1917年12月宣佈獨立，成立芬蘭共和國。由於當時新成立嘅布爾什維克政權勢孤力弱，喺迫不得已嘅情況下，新政權喺1917年結束前承認芬蘭嘅獨立地位。
 |
| 12月6日：芬蘭獨立日 |
文：老積
(聲音敘述)
更多二喬資訊：
沒有留言:
張貼留言