二喬歷史穿梭古今

二喬推特

二喬工作室網頁

二喬工作室相關資訊：

DSE應試路路通http://2kiu-workshop.blogspot.com/
二喬語文隨筆http://2kiu-language.blogspot.hk/

浪蕩天涯 http://2kiu-workshop-travel.blogspot

2023年4月16日星期日

歷史教科書唔講系列：飛越瘋人院之癲佬帝國-智齒(北齊名醫徐之才)(附聲音版)

現代社會，醫生嘅社會地位好高，唔少人對醫生好崇敬，原因係見到醫生，我哋自然聯想到專業，亦會感激醫生治病救人，當然佢哋嘅豐厚收入，亦會令一般人非常羨慕。

中國古代行醫嘅人社會地位唔高，但醫術高明嘅醫師，例如大家熟悉嘅匾鵲、華佗、張仲景等大國手，都會深受世人尊崇。相反，一啲有才冇德嘅醫生，縱使你醫術幾高明，世人都會嗤之以鼻。

今日老積為大家介紹一位北齊名醫，佢嘅名字叫徐之才。(資料1)大家睇完呢篇文章後，可以自行己評價呢位名醫，不過大家評還評，千祈唔好對號入座呀！

徐之才係南朝梁朝出生同成長，佢出身醫學世家，阿爸徐雄係南齊嘅名醫，弟弟徐之範亦係名醫，而徐之才嘅醫術更為出眾。

徐之才嘅醫術有幾犀利？老積用兩個例子都大家分享，有一個人經常腳踭腫痛，佢睇過唔少醫生都冇法治癒，後嚟搵咗徐之才睇病，徐之才問病人係唔係經常坐船，又習慣將雙腳放喺水中，病人答覆係確實如此。徐之才將病人嘅腳跟割開，找到兩粒細小嘅蛤(即哈唎，貝殼類)，估計係呢位病人長期將腳放入水中，有啲貝殼寄生咗喺腳裏面。千多年前，佢施行簡單嘅手術就醫好咗呢個人腳踭嘅毛病，都唔好話唔厲害。

第二個例子同武成帝高湛有關，高湛呢個人長期縱情酒色，搞到自己身體非常虛弱，徐之才用針藥將佢嘅病醫好，從此高湛對徐之才嘅醫術佩服得五體投地。

有啲嘢似乎係冥冥中整定嘅，閻王預咗位俾高湛，就算有神醫幫手都避唔到。徐之才經常討好武成帝寵臣和士開，喺和士開幫忙下，徐之才得以外放做大官。過咗無耐，武成帝舊病復發，老積估計係高湛再次縱容過度之故，當時嘅情況非常危急，高湛即刻派入急召徐之才回京，可惜一切嚟得太遲，皇帝喺徐之才抵達前一日已一命嗚呼。

好啦，我哋返轉頭睇吓徐之才其他嘅事蹟。徐之才除咗精通醫術外，佢又博通經史，對天文圖讖之學亦有一定認識。老積略為解釋吓，所謂圖讖，大致等同今日我哋所講嘅術數。

徐之才喺南朝嘅梁朝出生，年青時喺梁朝已薄有名氣。後嚟佢跟隨梁朝宗臣蕭綜投靠咗北魏，投靠北魏冇幾耐，魏國又分裂成東西魏。徐之才先後追隨東魏丞相高歡同佢個仔高洋，高洋就係老積曾多次提及嘅北齊開國癲佬皇帝啦。

可能徐之才屬梁朝嘅舊電池，佢為咗要討好高家呢班新主子，佢喺新主子面前落足鞋油擦鞋。當時高洋想篡位，但又害怕禪讓之後西魏宇文家族指責佢地犯上作亂，目無君上，當大家猶疑不決之際，徐之才用咗個比喻解決咗高氏家族嘅疑慮，佢咁講：「一千個人追逐一隻兔仔，當一個人追到牠，其他人自然會停手。」(資料2)徐之才所講嘅兔仔係指魏國政權，千人追逐表示好多人對呢個政權有興趣，但當高氏家族名正言順取代魏國之後，其他人自然唔會輕舉妄動。呢個比喻，令高洋決心取代東魏，建立新王朝北齊。

徐之才借一個生動比喻勸進高洋，無非係想喺新朝廷中扮演要角，佢並唔滿足自己高明嘅醫術，佢人生嘅目標係權位，所以佢對其他有權勢嘅人極力奉承。文宣帝高洋本來幾鍾意佢，可惜高洋嘅心腹楊愔認為佢係南朝嘅舊電池，想盡辦法抑制佢，所以佢喺高洋時代都係做一啲閒職。

到咗武成帝時，佢為求上位，全力諂媚皇帝身邊嘅寵臣和士開。徐之才嘅老婆係北魏廣陽王嘅妹妹，屬名門望族出身，和士開竟然姦淫咗佢，徐之才知道後，不特止冇嬲，仲同人講：「後生仔貪玩姐！」(資料3)

後主高緯即位，徐之才除咗諂媚和士開之外，又極力巴結後主奶媽陸令萱同佢個仔穆提婆。今次徐之才終於能成功爭取啦，後主升任佢做尚書令，仲封埋佢做郡王添。可惜好景不常，徐之才嘅靠山和士開被政敵所殺，後主任用盲人祖珽執政，祖珽唔鍾意徐之才，安排佢做太子太師之類嘅閒職，搞到呢位一代名醫不禁破口大罵。其實當時徐之才已70多80歲，但佢仍戀棧權位，可見權力呢樣嘢嘅誘惑實在太大，唔少人掂到就唔想放手。

順便講一件有趣嘅事，武成帝高湛有一次牙痛，原來佢口腔後面多生咗隻牙，於是佢問班太醫發生咩事，太醫鄧宣文如實報告，高湛發脾氣打咗佢一餐。後嚟高湛再問徐之才，徐之才嘅對答非常巧妙：「呢個係智牙，生呢種牙嘅人又聰明又長命。」(資料4)徐之才嘅擦鞋對答，令高湛條氣順晒。

「智牙」本來係擦鞋仔自創嘅詞語，估唔到竟然流傳甚廣，後世將智牙改稱成智慧牙、智慧齒，亦喺我哋依家慣常用嘅稱呼，或者呢樣嘢就係徐之才呢位北齊名醫一生中最大嘅貢獻啦。

文：老積

【資料來源】編者案：本工作室替老積先生的文稿補上資料來源，方便有興趣的讀者參考。
1.     
案：徐之才的事蹟見《北齊書》卷25〈列傳第25〉，下文不再列出處。
2.     
原文：「千人逐兔，一人得之，諸人咸息。」(《北齊書》卷25〈列傳第25〉) 
3.     
原文：「妨少年戲笑。」(《北齊書》卷25〈列傳第25〉) 
4.     
原文：「此是智牙，生智牙者聰明長壽。」(《北齊書》卷25〈列傳第25〉)

(聲音敘述)

【認識更多二喬工作室】
二喬面書
https://www.facebook.com/yikiuworkshop/
二喬推特
https://twitter.com/2kiu_workshop
二喬工作室網頁
http://2kiuworkshop.wixsite.com/home

二喬工作室相關資訊：
DSE應試路路通http://2kiu-workshop.blogspot.com/
二喬語文隨筆http://2kiu-language.blogspot.hk/
浪蕩天涯 http://2kiu-workshop-travel.blogspot

2023年1月24日星期二

白登之圍與張良無關

今年(癸卯年)新界鄉議局主席劉業強一如既往到沙田車公廟求簽，劉主席求得中簽，簽文曰：

威人威威不是威，只當著力有箴規。白登曾起高皇閣，終被張良守舊圍。

本文不是為大家解簽，而是想糾正坊間的謬誤。不少人認為簽文最尾兩句是講述漢高祖白登被匈奴圍困，最後幸得賢臣張良出謀，最終能解困突圍之事。

查以上解釋不符歷史事實，原因是白登之圍張良並無參與其事！

以下讓我們略述白登之圍的經過：公元前200年，漢高祖劉邦率領三十萬大軍親征韓王信。(此韓信並非漢的開國功臣、世人熟悉的軍事專家韓信，而是戰國時韓國的後裔，與韓信同名同姓。)當時漢高祖分封現在山西一帶土地給韓信，但韓王後來叛逃匈奴，並引匈奴軍隊入侵邊境，漢高祖於是率領大軍親征。漢軍初時節節勝利，後來匈奴軍隊引誘漢軍深入，圍困漢軍於白登(今山西大同一帶)，匈奴將白登重重圍困，漢軍七天七夜不能突圍。後來漢高祖採納謀臣陳平計策，用重金賄賂匈奴冒頓單于的閼氏(匈奴單于的妻子)，漢軍才得以突圍。身經百戰的劉邦，這一役幾乎老貓燒鬚，命喪匈奴人鐵蹄之下。

整件事和張良無關，「終被張良守舊圍」這句簽文，有可能是簽文錯用典故，又或另有所指也未定，坊間很多解釋都和歷史不符。

文：二喬工作室編輯部

【認識更多二喬工作室】

二喬面書

二喬推特

二喬工作室網頁

二喬工作室相關資訊：

DSE應試路路通http://2kiu-workshop.blogspot.com/
二喬語文隨筆http://2kiu-language.blogspot.hk/

浪蕩天涯 http://2kiu-workshop-travel.blogspot

2022年12月27日星期二

歷史教科書唔講系列：飛越瘋人院之癲佬帝國-無愁天子4(附聲音版)

再講吓無愁天子北齊後主高緯。

之前講過高緯即位之後，身處內外交困嘅境地，朝廷內部有一班讒臣，佢阿媽胡太后又異常淫亂，再加上外面有強敵北周。對呢個能力唔高嘅小皇帝嚟講，家事國事真係搞到佢一頭煙。但後主一於好少理，佢依然沉迷玩樂(之前老積曾提過佢有好多玩意，例如扮吓乞衣，做吓小販之類，大家可攞返嚟睇睇。)，個王朝日益衰敗好似唔關佢事咁。

後主高緯非常好色，呢個可能承襲咗佢阿爸武成帝高湛嘅基因，不過公道啲講佢荒淫嘅程度比唔上佢阿爸。
斛律皇后係後主嘅元配皇后，佢係斛律光個女，後主不嬲都唔多鍾意佢，斛律光被殺後斛律皇后被廢打入冷宮。(資料1)
後嚟後主立咗胡昭儀做皇后，佢係胡太后侄女，老積估佢係美女一名，後主起初非常鍾愛佢。胡后後嚟比後主乳母陸令萱中傷，大意話胡后同人講胡太后喺後宮有好多越軌行為。(資料2)太后知道大怒，喺眾人面前剃咗胡后個頭，仲勒令佢回娘家。後主千般不捨，但母命難違，只能夠同胡后分手。(資料3)
大家唔好以為後主係癡情種籽，佢只係一時唔捨得胡后，但宮中實在有太多美女，佢好快就另有所好，例如新立嘅穆皇后，佢初時好喜歡呢位穆皇后，為咗討好呢位新歡，佢花鉅資為皇后製作珍珠裙，佢又想造一輛七寶車討好皇后，七寶車喺一輛鑲滿寶石嘅馬車，為咗搜求稀有嘅寶石，後主竟然派使者帶住鉅款去死敵北周處購買。(資料4)
不過後主好快又移情別戀，後主最後嘅日子鍾情於宮中一位大美人馮淑妃馮小憐。(資料5)後主無論去到邊，佢都要馮淑妃相陪，兩人形影不離，就好似一對小情侶。

上期老積提過，北齊嘅勁敵係北周，而北周武帝雄才大略，佢銳意統一北方。北周軍隊氣勢如虹，侵佔左好多土地，加上後主將朝廷兩大皇牌斛律光同高長恭殺害(大家可參考老積之前文章)，北齊形勢可謂危如累卵。但北齊軍隊一向戰力好強，屬好打得嘅勁旅，只要打返一場漂亮勝仗，唔係冇機會反敗為勝。
公元577年，北周對北齊發動猛攻，後主親率重兵反攻軍事重鎮平陽，平陽嘅北周守將叫梁士彥，城內只有幾萬兵馬，面對北齊幾十萬大軍猛攻只能苦苦支撐，唯有死守等候援兵。北齊如果奪回平陽，北周武帝嘅統一大計就會瓦解，所以平陽一戰非常關鍵。
北齊軍隊日夜猛攻，佢地採用挖地道嘅做法，當時平陽城嘅牆角已經有幾處缺口，眼看城破在即，後主忽然叫停進攻。原來馮淑妃想睇城陷嘅經過，本來睇未睇咯，離遠觀察又唔會影響軍情嘅，偏偏馮淑妃勁貪靚，話要化行妝先出去睇攻城。佢個妝化左好耐，加上馮淑妃想睇城西嘅古跡，但個邊條橋爛左要修補，後主竟抽調攻城嘅工匠去修橋，修好橋後已入夜，北齊嘅進攻亦暫停落嚟。北周軍隊利用整晚時間修補城牆，封死地道，後嚟北齊軍隊就再無辦法攻入。無幾耐，北周武帝親率大軍救駕，北周軍隊反包圍北齊軍隊，整個形勢逆轉。



北齊軍隊雖然被包圍，但主力仍然喺度，面對未站穩陣腳嘅北周部隊，仍然有可勝之道。當時兩軍對峙佈陣，北齊軍隊稍稍後退，馮淑妃居然話「打輸左啦」，(資料6)其他嘅將領表示仲未接戰，軍隊未敗，糊塗嘅後主居然信馮淑妃，自己同馮淑妃策馬離開，結果北齊軍全線崩潰。北周軍後來繼續進迫，後主高緯連個江山都輸埋。(資料7)
女士貪靚，化個靚妝搞到遲到時有所聞，但搞到成個政權傾覆，老積唔知係唔係前無古人，後無來者啦。
後主帶住敗軍返到軍事重鎮晉陽，佢唔係諗吓點樣收拾殘兵敗將去反攻，又冇用重賞鼓勵班下屬死戰。佢天生怯懦，呢個時候想逃跑去北面嘅突厥，又想南逃至南方嘅陳國。佢又聽人講做咗樣出人意表嘅動作，就係學佢老豆武成帝咁傳位比太子高恒，自己做太上皇，當時高恒只係一個八歲嘅小朋友！
高緯返到齊國首都鄴城，北周軍隊已重重圍困鄴城，於是高緯帶住幼主向東逃，打算逃跑到南方嘅陳國，結果中途比北周軍隊截獲，北齊亦宣告滅亡。(資料8)

去到北周之後，高緯竟然要求北周武帝交返馮小憐比佢，武帝竟然答應佢嘅要求，不過無幾耐之後武帝就將高緯殺死。高緯死後，武帝將馮小憐賞賜比宗室宇文達，據說宇文達非常寵愛呢位大美人。後嚟馮小憐陷害宇文達一位妃子(歷史冇留低名字)，搞到呢位妃子差啲冇命。北周滅亡後，隋文帝楊堅將馮小憐賞賜給呢位妃子嘅哥哥李詢。楊堅咁做分明靠害，可能係出於報復，李詢阿媽經常虐待馮小憐，又要去做粗重嘅家務，最後迫令佢自殺。呢位間接令北齊滅亡嘅禍水紅顏，就咁樣完結咗一生。(資料9)

文：老積

【資料來源】編者案：本工作室替老積先生的文稿補上資料來源，方便有興趣的讀者參考。
1.  事見《北史》卷14〈列傳2后妃下〉及《北齊書》卷9〈列傳第1〉。
2.  原文：「太后行多非法，不可以訓。」(見《北齊書》卷9〈列傳第1〉)
3.  事見《北史》卷14〈列傳2后妃下〉。
4.  事見《北齊書》卷9〈列傳第1〉
5.  馮小憐的事跡可參見《北史》卷14〈列傳2后妃下〉。
6.  「兵纔合，齊主與馮淑妃並騎觀戰，東偏少卻，淑妃怖曰：『軍敗矣。』」(見《資治通鑑》卷172〈陳紀6〉。
7.  後主與馮淑妃事可參見《北史》卷14〈列傳2后妃下〉及《資治通鑑》卷172〈陳紀6〉。
8.  事見《資治通鑑》卷173〈陳紀7〉。

9.  事見《北史》卷14〈列傳2后妃下〉。
(聲音敘述)

【認識更多二喬工作室】

二喬面書

二喬推特

二喬工作室網頁

二喬工作室相關資訊：

DSE應試路路通http://2kiu-workshop.blogspot.com/
二喬語文隨筆http://2kiu-language.blogspot.hk/

浪蕩天涯 http://2kiu-workshop-travel.blogspot

2022年12月19日星期一

歷史教科書唔講系列：飛越瘋人院之癲佬帝國-無愁天子3(附聲音版)

蘭陵王

如果大家記性好，應該記得喺南北朝後期，北方分為北齊北周兩大政權。喺文宣帝高洋時代，當時嘅形勢係齊強周弱，好多人都以為北齊始終會消滅北周，但到咗武成帝時代，情況開始逆轉，加上北周出咗一個雄才大略嘅領導人：北周武帝宇文邕，北齊嘅形勢開始不妙。尚幸北齊手上有兩大皇牌，就係兩位悍將斛律光同高長恭。

斛律光出身於武人世家，佢阿爸斛律金亦係名將。斛律光早喺17歲時已受到東魏丞相高歡賞識，高氏家族歷代領導人都對佢好信任。佢多次領兵打敗北周，又曾率領鐵騎進攻突厥，最著名係汾水之戰，斛律光擊退北周大將尉遲迥，親手射殺北周柱國可叱雄，呢次戰役，武成帝對斛律光封賞有加，將佢提升為太尉(相等於現代嘅國防部長)，又將斛律光嘅第二女納為太子妃(即係下嫁比後主高緯，後嚟成為斛律皇后)。(資料1)
斛律光治兵嚴明，賞罰分明，係戰場上身先士卒衝鋒陷陣，因此深受部下愛戴，正因為係咁，引嚟後主嘅猜忌。(資料2)斛律光喺細節上唔識收斂，有一次佢打咗勝仗，
但係後主冇俾任何賞賜就命令班軍人解散，斛律光為下屬出頭，密表上奏後主要求請封。佢冇按後主要求解散軍隊，仲帶住班下屬向前挺進，後主大驚，最後派特使慰勞一番，軍隊先願意解散。後主表面上對斛律光客客氣氣，仲晉封佢做清河郡公，但實際上對佢非常不滿，呢一刻已動咗殺機。(資料3)
斛律光素來不滿朝廷大臣祖珽，呢個祖珽係一個正牌小人，祖珽因病雙目失明，斛律光曾對手下講：「自從盲人掌握國家大權後，佢從來唔會同我哋溝通，恐怕會耽誤咗國家大事。」(資料4)祖珽知道後心懷怨恨，不斷喺後主面前中傷斛律光。靠一把口中傷一個人嘅威力係唔夠嘅，多兩個人幫手就唔同，呢兩個人就係高緯嘅乳母(奶媽)陸令萱同佢個仔穆提婆。陸令萱喺武成帝時代已深得皇帝同皇后(即係後嚟嘅胡太后)嘅寵信，穆提婆子憑母貴，成為太子高緯嘅心腹；高緯做咗皇帝後，非常倚重佢兩母子。(資料5)
穆提婆曾經向斛律光提親，斛律光出身名門，非常睇唔起陸令萱兩母子，因此一口拒絕，兩個人從此結下深仇。當祖珽開始中傷斛律光，陸令萱兩母子當然唔會放過機會，一齊落井下石。呢個時候，碰啱北周大將韋孝寬施行反間計，喺北齊首都鄴城造謠，大意謂斛律光想作反做皇帝。於是後主假意賞賜斛律光駿馬，召佢入宮行賞，然後搵人殺死斛律光。可憐一代名將就咁樣喪命，而斛律家族亦遭到滅門之禍。(資料6)
北周聽到斛律光嘅死訊，即刻開香檳慶祝。後嚟北周滅咗北齊，北周武帝帶軍隊凱旋入鄴城，佢追封呢個死敵做崇國公，仲爆咗句金句添：「呢個人如果仲喺度，朕點能夠進駐鄴城。」(資料7)後主殺斛律光嘅事，大家有冇似曾相識嘅感覺，明朝崇禎皇帝殺袁崇煥嘅情節，係唔係同斛律光遇害有啲相似？歷史有時真係有好多巧合之處。

北齊嘅另一皇牌係高長恭，佢係高澄嘅第四個仔，即癲佬皇帝高洋嘅侄，佢後嚟被封做蘭陵郡王，世人習慣稱呼佢做蘭陵王。
據說高長恭係一個美男子，講嘢嫡滴滴，佢嫌自己打仗時唔夠英，所以佢總係戴住面具上戰場，所以面具係佢嘅icon嚟。佢作戰非常勇猛，經常率先衡入敵陣，北齊軍隊仲幫佢作咗首歌，名為《蘭陵王入陣曲》，頌揚高長恭勇猛。(資料8)
芒(粤音亡)山之戰係高長恭最出名嘅勝仗，當時金墉城被北周軍隊重重圍困，佢同斛律光左右夾擊北周軍隊，高長恭深入敵陣，將北周大軍殺到落花流水。(資料9)
芒山之戰後，高長恭再替北齊打咗幾場勝仗，表面上後主對佢信任有加，實質上對呢位有軍權嘅宗室非常猜忌。高長恭諗到一個自保嘅方法，就係不斷貪污，而且所貪嘅數目越嚟越大，佢咁樣做係希望後主明白佢只係貪財，對政權並冇絲毫野心。不過咁樣做仍然冇用，朝廷中有好多流言，於是高長恭稱病唔再帶兵，但糊塗嘅後主竟然命人賜藥俾高長恭。當然，所賜嘅唔係咩靈丹，而係毒藥，一代名將蘭陵王就咁一命嗚呼！(資料10)

無愁天子手執兩大皇牌，本來真係可以無憂無慮過吓皇帝癮，依家自斷兩臂，咁同自掘墳墓並無分別。

蘭陵王威名遠播至日本

文：老積

【資料來源】編者案：本工作室替老積先生的文稿補上資料來源，方便有興趣的讀者參考。
  事見《北齊書》卷17〈列傳第9〉。
  《資治通鑑》卷171〈陳紀5〉。
  事見《北齊書》卷17〈列傳第9〉。
  事見《資治通鑑》卷171〈陳紀5〉。
  事見《北齊書》卷17〈列傳第9〉及《資治通鑑》卷171〈陳紀5〉。
  同上。
  北周武帝原話：「此人若在，朕豈能至鄴。」(《北齊書》卷17〈列傳第9〉)
  事見《北齊書》卷11〈列傳第3〉。
  《北齊書》卷11〈列傳第3〉作「芒山之敗，長恭為中軍。」案此役北齊大勝，「芒山之敗」應為「芒山之捷」。又芒山《北史》作「邙山」。
事見《北齊書》卷11〈列傳第3〉及《資治通鑑》卷171〈陳紀5〉。

(聲音敘述)

【認識更多二喬工作室】

二喬面書

二喬推特

二喬工作室網頁