2022年8月29日 星期一

華沙起義

 

波蘭家鄉軍(Home Army)

1944年8月1日，被納粹德國佔領咗五年(1939年9月德國入侵波蘭，後嚟波蘭比德俄兩大國瓜分)嘅波蘭首都華沙爆發咗大規模嘅起義運動，史稱「華沙起義」(Warsaw Uprising)。
華沙起義博物館

喺波蘭家鄉軍(Home Army)領導下，超過十萬名嘅波蘭人，不分男女老幼，使用簡陋嘅武器如步槍、汽油彈之類同納粹德軍對抗。
波蘭家鄉軍喺一個地下組織，佢地喺波蘭全境進行反納粹嘅地下活動。1944年，德軍喺東線節節敗退，蘇聯紅軍已進佔波蘭境內。到咗同年7 月，蘇聯紅軍已喺華沙郊區集結，波蘭家鄉軍見時機成熟，於是計劃發動一場大規模起義。波蘭家鄉軍係一個親西方組織，佢哋唔認同共產主義，所以佢地冇將行動通知其他親蘇聯嘅抗德團體，更冇將起義嘅事通知蘇聯軍方。
8月1日，起義軍喺華沙發動突襲，唔少民眾呼應起義軍嘅行動，疏於防備嘅德軍喺華沙失去唔少重要據點。但由於起義軍並冇重裝備，德軍喺重整後立即策動反攻，而喺華沙另一邊嘅蘇聯軍隊卻按兵不動，並冇喺戰術或裝備上支援起義軍。
希特拉接到華沙起義嘅消息後，立即派精銳部隊增援，華沙起義軍同民眾苦苦支撐，終於被迫喺10月2日向德軍投降。德軍再次以勝利者嘅姿態進駐華沙，波蘭起義軍同民眾則傷亡慘重，估計全市有20-30萬人死亡，整個華沙幾乎被夷為平地(今日嘅華沙市都係二戰後重建)。
1945年1月，蘇聯軍隊佔領華沙，波蘭人終於戰勝納粹惡魔，但卻迎嚟一頭貪得無厭嘅北極熊！


如大家有機會遊覽華沙舊城，會發現一個戴住大頭盔，身穿軍服持槍小孩嘅銅像。呢名小孩名叫Mały Powstaniec，係其中一名參與華沙起義嘅小童，當時唔少青少年走上街頭，用簡陋嘅槍枝同裝備精良嘅德軍對戰，決心用血肉之軀保衛家園。很不幸，Maly戰死沙場，死時只有13歲！

Mały Powstaniec像

文：老積

更多二喬資訊：




By at 沒有留言:
Labels: ,

2022年8月12日 星期五

歷史教科書唔講系列：流亡日本嘅儒學之神(附聲音版)

朱舜水像

朱舜水可能好多人未聽過，記得老積細個讀中史，教科書有一、二句提到呢個人，大致上係話佢喺明亡後流亡日本，並喺彼邦弘揚儒學之類。至於現時嘅中史教科書，幾乎對此人隻字不提。但另一方面，日本對呢個人奉若神明，用依家嘅潮語嚟講，日本人將此人當成「儒學之神」。
朱舜水原名朱之瑜，舜水係佢嘅號，係佢到咗日本之後改嘅。點解叫舜水？原來朱氏係浙江餘姚人(老積想提提大家，「餘姚」應作「餘姚」而非「余姚」，網上有人寫作「余姚」係受繁簡轉換嘅誤導)，舜水係餘姚古稱，佢到日本改呢個號係表示不忘故土(情形就如有位移民海外嘅朋友，將仔女嘅名字改成念港、思港一樣)。
朱舜水生於1600年(明萬曆28年)，佢嘅學問相當好，但一直冇做官，1644年(明崇禎17年)明朝滅亡，朱舜水出山為南明各政權奔走，曾到安南聯絡當地人士反清，可惜失敗而回。
後嚟朱舜水又幫助監國嘅魯王同鄭成功，1659年(清順治16年)，鄭成功領軍大舉反攻，前鋒部隊進攻南京失敗，朱舜水受鄭成功所託到日本求援。呢次任務，為朱氏嘅人生展開新一頁。
1659年，朱舜水抵達日本長崎，受到當地嘅藩主同學者禮待，朱氏亦知道明朝復國無望，於是決定長留日本。
1665年，水戶藩主(領地喺現今日本茨城)德川光國親自拜訪朱氏。德川光國係江戶德川幕府嘅第二號人物，佢對朱舜水非常尊重，並以弟子禮侍奉朱舜水。德川光國邀請朱舜水到江戶講學，其學問人品折服當地嘅日本學者。

德川光圀(國)像

朱舜水嘅儒家思想深深影響日本學者，生前死後，日本學界均把朱氏奉若神明。1682年，朱舜水病逝，享年82歲，喺當時嚟講算係高壽。德川國光親臨朱氏喪禮，並將佢葬喺歷代水戶藩主之旁，後嚟又為朱氏編輯《舜水先生文集》，從而可見朱氏嘅崇高地位。
朱舜水嘅儒學(漢學)思想對日本學界影響甚大，其「尊王攘夷」嘅主張，喺日本明治維新前成為當時學界嘅旋風。東京農學院內有一塊「朱舜水先生終焉之地」嘅石碑，可見今時今日本學界仍非常尊重呢位講求氣節嘅大儒。



順帶一提一件軼事，日本侵華期間，日軍佔領餘姚，有日本軍人衝入朱氏祠堂，當佢哋見到朱舜水嘅畫像，竟然敬禮鞠躬而退！

文：老積

(聲音敘述)

更多二喬資訊：



By at 沒有留言:
Labels: , ,

2022年8月1日 星期一

歷史教科書唔講系列：南明與日本(附聲音版)


明思宗崇禎皇帝喺煤山自縊，明朝首都俾李自成嘅大順政權佔領，跟住吳三桂引清兵入關，華北迅即被清軍佔領。相信呢段歷史人人皆知，教科書亦必定有記載，毋須老積喺度多講。
崇禎嘅死訊傳到南方，明朝嘅宗室同舊臣先後建立咗幾個小朝廷，甚麼福王、魯王、唐王大家都可能聽過。喺危難之中，呢啲小朝廷不但冇勵精圖治，而且內部互相傾軋，最後一一覆滅！
當時某啲明朝大臣希望向外請救兵幫助明朝復國，對象包括安南、琉球等小國，更有人提出向羅馬教廷班兵(有機會再談)，而最多人提出搵救兵嘅地方係日本。南明多次派人到日本乞師，可惜都係無功而還。
大家可能奇怪，點解南明君臣會揀離中國比較遠嘅日本班救兵？翻一翻明朝歷史，前有倭寇侵略中國東南沿海，後有豐臣秀吉入侵朝鮮同明軍大戰，明朝同日本嘅關係唔係欠佳咩？
南明君臣向日本乞師原來同海盜有關，南明幾個政權，包括魯王同唐王，佢哋都得到東南沿海嘅海盜支持先能夠苦苦支撐，而大部分海盜嘅基地就喺今日日本九州一帶，所以南明政權向日本請救兵唔係偶然嘅事。
第一個主張向日兵乞師嘅人係鄭芝龍，佢就係鼎鼎大名嘅鄭成功父親。鄭芝龍原本係海盜出身，佢嘅賊竇喺平戶(今日本平戶市，長崎附近)。鄭芝龍娶咗日本人為妻，鄭成功就係佢嘅日本妻子所生。

日本平戶：明末時為中國海盜鄭芝龍的根據地


鄭成功出生地，日本人為其立碑

鄭芝龍後嚟歸順明廷做咗大官，話雖如此，佢仍有龐大嘅海盜船隊，縱橫於東南沿海同台灣海峽一帶，宛然係一個獨立王國。
清兵入關後，鄭芝龍擁立明宗室唐王，鄭芝龍諗住利用自己喺日本嘅人脈，多次派使者到日本乞師，但都俾日本方面拒絕。
鄭芝龍後嚟降清，但南明幾個朝廷同地方勢力，例如魯王同鄭成功都冇停止向日本請救兵，甚至連大儒黃宗羲亦主張向日本乞師(編者案：黃氏撰有《日本乞師記》一文，表示完全認同向日本請救兵)，可惜通通失望而回！
其實日本有部分人想義助南明，例如薩摩藩(日本鹿兒島一帶)嘅武士真係想帶兵到中國，無奈當時日本已進入德川幕府時代，江戶嘅德川幕府嚴格執行鎖國政策，德川家族唔想理會日本以外嘅事，下令其他藩國切勿出兵，佢哋對明朝君臣嘅要求好禮貌咁婉拒咗。
德川幕府：堅決執行閉關鎖國政策


明朝君臣意圖勾結外國勢力，希望能力挽狂瀾以維持中華正朔，可惜都係失敗收場！
就算日本肯借兵，老積認為南明政權都唔能夠扭轉敗局，原因係當時嘅清朝軍隊太勁，而南明政權太爛！
當然，歷史係冇如果嘅......

文：老積

(聲音敘述)

更多二喬資訊：





By at 沒有留言:
Labels: , ,

2022年7月28日 星期四

芬蘭與俄國之恩怨情仇(4)_(附聲音版)

蘇聯喺冬季戰爭慘勝，雖然奪得咗芬蘭大片土地，但蘇軍傷亡慘重，當時蘇聯外交部長莫洛托夫指蘇軍有46000多人傷亡。相信不少人都知道，蘇聯嘅數字歷來有好多水份，呢次當然唔會例外，但蘇共高級官員都向外承認有幾萬人傷亡，可見戰況之慘烈(莫洛托夫指芬蘭有60000人死傷，言下之意你哋嘅死傷仲甘，呢個喺蘇聯嘅一貫宣傳手法)。
打敗芬蘭後，蘇聯當局並唔收手，佢哋喺1940年中吞併同芬蘭關係密切嘅小國愛沙尼亞。
芬蘭當局並唔係省油嘅燈，佢哋一方面積極擴軍，另一方面同迅速崛起嘅納粹德國合作，等待時機收復失地。
1941年6 月22日，芬蘭復仇嘅時機來臨，納粹德國展開巴巴羅薩計劃，德軍大舉入侵蘇聯。6月25日芬蘭亦向蘇聯宣戰，芬蘭迅即收復冬季戰爭失去嘅領土，並進一步入侵蘇聯(下圖)。由於芬蘭同德國「行埋」，因此英法等同盟國認定芬蘭係軸心國嘅一份子。

1941年夏季，芬蘭反攻蘇聯


1944年，德蘇戰爭已出現大逆轉，德軍節節敗退，蘇軍向芬蘭地區反攻，芬蘭慘敗，被迫簽訂停戰協定，同時損失大片領地。
由於芬蘭同蘇聯接鄰，加上曾助德國，芬蘭其實好大機會好似波蘭捷克等東歐國家變成蘇聯嘅衛星國。尚幸英美等國不斷向蘇聯施壓，芬蘭先避過一劫。戰後芬蘭同蘇聯簽訂多份和約，確保兩國之間能和平相處，同時芬蘭成為中立國，明確表示唔加入西方領導嘅北約陣營(NATO)及蘇聯領導嘅華沙陣營(Warsaw Pact)。

北約與華沙集團對峙圖


1991年蘇聯政權崩潰，芬蘭與蘇聯嘅恩怨似乎告一段落。2022年俄國入侵烏克蘭，呢場戰爭重新喚醒芬蘭人以往被俄國欺凌嘅傷痛，現任芬蘭政府打破幾十年中立嘅國策，申請加入北約陣營。
芬俄嘅情仇，似乎仍未到終章！

文：老積

(聲音敘述)

更多二喬資訊：


By at 沒有留言:
Labels: ,

2022年7月26日 星期二

芬蘭與俄國之恩怨情仇(3)_(附聲音版)


1917年芬蘭獨立後，隨即爆發內戰。執政嘅右翼政府同親布爾什維克嘅左翼份子爆發衝突。右翼政府受到德國支持，左翼份子則受俄國剛上台嘅布爾什維克政權支持。最後右翼政權打敗左翼份子，成為芬蘭嘅掌權者。
但新成立嘅芬蘭共和國根基並唔穩固，所謂「前門拒虎，後門進狼」，去俄化之後德國人開始干預芬蘭事務，幸好1918年底第一次世界大戰結束，德國宣佈投降，芬蘭終於可以直正獨立自主。
但隨之而來芬蘭與新成立嘅蘇聯政權發生戰爭，俄國新成立嘅蘇維埃政權對失去芬蘭呢個附庸國心有不甘，加上兩國之間有領土糾紛，引致兩國爆發軍事衝突，戰爭喺1920年結束，兩國於同年簽訂和約。
戰爭雖然結束，但整個1920及30年代，兩國嘅領土問題並未解決，雙方關係依然緊張。當時嘅芬蘭係中立國，佢哋嘅政府希望以中立國嘅身分儘量避開歐洲大國之間嘅糾紛。
但要來嘅始終要來，芬蘇之間嘅衝突始終唔能夠避開。1939年，德國同蘇聯簽訂互不侵犯條約，繼而喺同年9月，兩國出兵波蘭並將波蘭領土瓜分。蘇聯侵略鄰近地區嘅舉措冇停落嚟，接着蘇聯脅迫波羅的海三國，將佢哋變成蘇聯嘅附庸，進而迫芬蘭談判，要求芬蘭交出大片領土。
兩國就領土問題多番交涉，芬蘭多次作出讓步，但蘇聯方面獅子開大口，始終唔肯接受芬蘭嘅條件，並威脅會採取軍事行動。1939年底，雙方最終爆發大戰，史稱「冬季戰爭」(Winter War)。
芬蘭軍隊在冬季戰爭中奮起抗敵

戰爭由1939年11月打至1940年3月。芬蘭外無援軍，軍隊人數同裝備均遠遠落後於蘇聯。但戰爭嘅結果出乎眾人意料之外，蘇軍傷亡慘重，傳聞蘇軍死傷人數有幾十萬，甚至接近一百萬！芬蘭軍隊雖然多次痛擊蘇軍，但因為國力遠不及蘇聯，喺1940年3月同蘇軍簽訂和約，並被迫割讓大片領土比蘇聯。
芬蘇嘅冬季之戰，無論背景同過程都同今日嘅烏俄之戰好相似。當年蘇聯尚能「跌落地揦返拃沙」，今日嘅俄國能否故技重施，我哋只能拭目以待。


文：老積

(聲音敘述)

更多二喬資訊：


By at 沒有留言:
Labels: ,
訂閱： 文章 (Atom)