二喬歷史穿梭古今

二喬推特

二喬工作室網頁

二喬工作室相關資訊：

DSE應試路路通http://2kiu-workshop.blogspot.com/
二喬語文隨筆http://2kiu-language.blogspot.hk/

浪蕩天涯 http://2kiu-workshop-travel.blogspot

2022年10月26日星期三

歷史教科書唔講系列：飛越瘋人院之癲佬帝國-北齊文宣帝高洋(5) (附聲音版)

講開高洋，唔能夠唔講佢鍾意飲酒呢樣嘢。中國歷史上鍾意飲酒嘅人好多，但飲得佢咁癲嘅，老積相信佢認左第二，冇咩人敢認第一。
老積曾經講過，高洋清醒嘅時候英明神武，頭腦冷靜，指揮軍隊有條不紊，甚至佢嘅勁敵都好佩服佢。但佢一飲醉酒就會亂嚟，鍾意隨處打人、殺人、甚至肢解人，其中一樣佢經常採用嘅武器就係鋸，佢會隨身帶住鋸，當佢酒醉殺人後就會攞把鋸出嚟，跟住發生咩事，都無謂我多講啦！

佢又鍾意參加派對，成日走去啲高官貴族屋企，喺宴會上一定飲到high晒，high喺上嚟會袒露上身，塗脂抹粉扮作婦人，披頭散髮又唱又跳(資料1)。如果佢喺今日嘅後生仔，可能會參加男團都未定！呢個時候就係最危險嘅時候，高洋情緒高漲，如有人唔合佢意，佢就會大開殺戒！之前曾同大家講佢帶埋薛妃嘅頭臚去宴會，嚇到開P嘅人三魂唔見七魄，我估當時同高洋開派對嘅男男女女，一定同走入一間猛鬼屋冇咩分別。

佢酒醉後襲擊嘅對象包括平民、下屬、官員，以致自己嘅親人。 佢喺街上隨意殺人， 甚至將人肢解同放火燒死， 佢當老百姓就係螞蟻咁，殺平民係家常便飯(資料2)。
試過有一次飲醉酒，對一名叫穆子容嘅官員大發脾氣，於是除晒佢啲衫用箭射佢，射唔中就用木棍插佢肛門(資料3)。
佢對親人亦唔客氣，有一次佢飲醉酒去左李皇后屋企，冇啦啦用箭射李皇后阿媽崔氏，崔氏閃避開，高洋一路追打崔氏，一路辱罵佢：「我飲醉左連阿媽都冇面畀，何況係你呢個老太婆。」(資料4) 高洋連阿媽都唔畀面，何況係外母崔氏！因為用箭射唔到崔氏，於是抽條馬鞭出嚟亂打一輪，據史書講打左超過100吓，但冇講有冇打中崔氏(資料5)！

高洋清醒時都知道飲酒唔啱，佢試過好多次戒酒，例如有一次誓神劈願對婁太后話戒酒，但戒左十日就故態復萌。又例如有一次佢六弟高演勸佢戒酒，佢大發脾氣話要殺左呢個細佬，但轉頭就掃晒酒杯落地，「好，我就戒比你睇」，結果過左幾日佢飲得仲狼過以前(資料6)。

高洋大哥高澄被蘭京所殺，高洋冷靜應對，迅速派軍隊平亂，當時佢只係19歲，周圍嘅人都覺得佢有大將之風(資料7)。佢雖然處事殘忍，但做事果斷，頭幾年施政冇咩太大問題，但佢後嚟飲酒愈嚟愈厲害，人就更加痴線，到後期可以話完全失控，31歲就暴斃而死。有好多人推測佢係長期酒精中毒，但老積認為佢有可能中鉛毒，因為南北朝時中原一帶仲未發明蒸餾嘅釀酒技術，酒精純度唔高，酒精中毒應唔會太嚴重，我估佢中鉛毒嘅機會較大，因為古代嘅盛酒器多係青銅或銀器鑄造，呢類酒器當中往往混雜左鉛。高洋係酒痴，佢慢性中鉛毒嘅機會唔細，因此佢清醒時處事會有條不紊，但又經常神經錯亂，癥狀同中鉛毒相似。
以上只係老積胡亂推測，冇咩實際嘅證據。

文：老積

【資料來源】編者案：本工作室替老積先生的文稿補上資料來源，方便有興趣的讀者參考。
1.  事見《北齊書》卷4〈帝紀第4〉。
2.  事見《北齊書》卷4〈帝紀第4〉。
3.  事見《北齊書》卷4〈帝紀第4〉。
4.  《資治通鑑》原文：「吾醉時尚不識太后，老婢何事。」(見卷166〈梁紀22〉)。
5.  事見《資治通鑑》卷166〈梁紀22〉。
6.  事見《資治通鑑》卷167〈陳紀1〉。

7.  事見《北齊書》卷4〈帝紀第3〉。

(聲音敘述)

二喬面書

二喬推特

二喬工作室網頁

二喬工作室相關資訊：

DSE應試路路通http://2kiu-workshop.blogspot.com/
二喬語文隨筆http://2kiu-language.blogspot.hk/

浪蕩天涯 http://2kiu-workshop-travel.blogspot

2022年10月22日星期六

歷史教科書唔講系列：飛越瘋人院之癲佬帝國-北齊文宣帝高洋(4) (附聲音版)

高洋喜怒無常，喜歡隨意殺人，係一個天生殺人狂嚟！例如有一次佢微服出巡，喺路邊隨意問一個婦人覺得當今天子係一個點樣嘅人，個婦人回答話當今聖上瘋瘋顛顛，佢立即拔刀殺左個女人，類似咁嘅事可以話數不勝數。(資料1)

佢殺官員就好似斬瓜切菜咁，有次佢新建成左三個華麗嘅高臺，唔知係唔係興奮得滯又飲大左，竟然攞枝長矛出嚟亂拮，竟然拮死左都督尉子輝！(資料2)

高洋呢個人對宗室都好心狠手辣，甚至可以話比佢對付官員同平民更兇狠。我舉一例同大家分享：高家中大哥係高澄，老積之前講過佢，佢死喺僕人蘭京之手；高洋喺老二；老三叫高浚，據史書講頗有才幹，高洋好嫉忌佢，冇啦啦將佢收監；七弟高渙更慘，佢冇咩野心，只係因為有術士同高洋講，將來奪高氏政權嘅人穿黑衣，高洋於是問身邊嘅擦鞋仔，天下間乜嘢最黑，有個擦鞋仔就話「漆」最黑。大家都知漆係顏料，咁又同高渙有咩關係呢？原來「漆」與「七」音近，高洋立即聯想到高渙排第七，心想呢個細佬可能奪取我嘅政權，於是將佢收監。(資料3)所以話文字獄呢家嘢，真係點都有可能中，點避都避唔到！

講少少花生嘢，個術士嘅預言真係準過麥玲玲，後嚟高氏政權比死敵「宇文」氏所滅，而宇文家族崇尚黑色，佢地嘅軍隊都著黑衣。事後睇返，高渙被收監真係好無辜。

講返高浚、高渙，佢地困左喺監獄幾年，有一日，高洋突然記起呢兩位老弟，竟然走去探監。見到兩位老弟，高洋忽然良心發現，話要放人，呢個時候身邊嘅擦鞋仔又發揮佢地嘅功能，叫高洋唔好放虎歸山。順帶一提，呢個擦鞋仔大有來頭，佢叫高湛，係高洋嘅九弟，後嚟做埋皇帝添，歷史稱呼佢做武成帝。高洋聽咗九弟嘅建議，立即拔劍猛刺兩位老弟，佢兩個老弟自細習武，竟然猛力反撲，高洋見打佢地唔過，叫手下點火，活活將佢地燒死！(資料4)

一個人殘忍嗜殺已經喺好恐怖嘅事，自己心狠手辣，要自己嘅至親同自己一樣都要咁殘忍，其實更加恐怖！高洋嘅太子高殷，性格同爸爸好唔同，佢可能自細讀儒家嘅經典，待人寬厚，性格柔弱。高洋覺得個仔咁懦弱，將來一定難成大器，有一次，咁專登帶高殷到監獄，然後要高殷親自把犯人斬首，高殷千般不願，高洋不斷逼迫自己個仔，高殷無奈落刀，但可能因為太驚或者唔忍心，犯人嘅身首冇分離到，高洋登時大怒，抽出馬鞭鞭打太子。(資料5)

高殷真係一個悲劇人物，有個咁變態嘅老豆，佢將來嘅下場亦十分之悲慘，遲啲老積會同大家交代。

文：老積

【資料來源】編者案：本工作室替老積先生的文稿補上資料來源，方便有興趣的讀者參考。
  事見《北史》卷7〈本紀第7齊本紀〉。
  事見《資治通鑑》卷167〈陳紀1〉及《北史》卷7〈本紀第7齊本紀〉。
  事見《資治通鑑》卷167〈陳紀1〉。
  事見《資治通鑑》卷167〈陳紀1〉。
 事見《資治通鑑》卷167〈陳紀1〉。

(聲音敘述)

二喬面書

二喬推特

二喬工作室網頁

二喬工作室相關資訊：

DSE應試路路通http://2kiu-workshop.blogspot.com/
二喬語文隨筆http://2kiu-language.blogspot.hk/

浪蕩天涯 http://2kiu-workshop-travel.blogspot

2022年10月11日星期二

歷史教科書唔講系列：飛越瘋人院之癲佬帝國-北齊文宣帝高洋(3) (附聲音版)

繼續談談北齊文宣帝高洋嘅「癲史」。先旨聲明，以下內容有啲血腥同核突，希望大家有心理準備。

高洋呢個人，除左鍾意飲酒同殺人外，佢同好多獨裁領袖都一樣鍾意女色。喺眾多妃嬪中，佢最鍾意係薛妃，不過薛妃出身唔係咁好，佢未入宮前係「娼婦」。其中薛妃同北齊宗室高岳有一段情，高洋諗起薛妃同高岳瞓過覺就好嫉忌，竟然一怒之下，將高岳同介紹薛妃比高岳認識嘅薛妃家姐殺左。

有一次高洋正想同薛妃歡好之際，佢諗起薛妃同高岳上過床嘅事，忽然妒火中燒，當然幾可肯定佢當時又飲大左，一怒之下竟然殺左薛妃。本來皇帝有無上大權，殺一個妃子無咩咁奇，但奇在薛妃之死竟然令高洋嘅「癲性」無限引爆！

或者高洋實在太愛薛妃，雖然殺左佢，但又好唔捨得，於是割左薛妃嘅人頭，帶埋佢去開P。原來高洋呢個人好鍾意開派對，喺宴會中會落場唱歌跳舞、當然唔少得飲酒啦。佢今次去開P愈飲愈high，high到突然間拋左薛妃嘅人頭出嚟，嚇到宴會中嘅人雞飛狗走。(資料1)
高洋返到屋企，愈諗愈掛住薛妃，佢親手將薛妃肢解。高洋呢個人好鍾意殺人，殺左人之後又鍾意將人肢解，佢令老積諗起香港上世紀80年代變態殺手林過雲(見下圖)，林過雲殺人後鍾意肢解人並製成標本，高洋如果生係呢個世代，一定同林過雲一樣成為「名留青史」嘅變態殺手！

變態殺手林過雲


佢肢解完薛妃後，竟然將薛妃嘅大髀製成琵琶。高洋呢個人雖然變態，但能文能武，真係服左佢！整完琵琶後，佢帶住呢件自製樂器又去開P，喺席間佢居然拎左個琵琶出嚟自彈自唱，其中一句歌詞係：「佳人難再得！」(資料2)
聽到佢嘅歌聲，見到佢件樂器，派對上嘅人有冇隔夜飯都嘔返出嚟，恕老積未能回答大家，因為史書冇記載。或者佢真係好愛薛妃，隨後佢叫手下用車運走薛妃屍體，自己披頭散髮跟隨其後，邊走邊喊。(資料3)佢嘅哭聲喺哀悼薛妃，還係嫌自己做得未夠癲，真係不得而知啦！

順帶一提，南北朝時代嘅琵琶係打橫彈，好似依家啲人彈結他咁，而唔係打直彈嫁！(留意附圖漫畫公仔彈琵琶嘅方法，呢個喺唐代以前嘅彈法)

唐以前琵琶彈法(橫向)


唐以後琵琶彈法(直向)

文：老積

【資料來源】編者案：本工作室替老積先生的文稿補上資料來源，方便有興趣的讀者參考。
1.   事見《資治通鑑》卷166〈梁紀22〉。
2.   事見《資治通鑑》卷166〈梁紀22〉。
3.   事見《北史》卷七〈本紀第七齊本紀〉。

(聲音敘述)

二喬面書

二喬推特

二喬工作室網頁

二喬工作室相關資訊：

DSE應試路路通http://2kiu-workshop.blogspot.com/
二喬語文隨筆http://2kiu-language.blogspot.hk/

浪蕩天涯 http://2kiu-workshop-travel.blogspot

2022年10月5日星期三

歷史教科書唔講系列：飛越瘋人院之癲佬帝國-北齊文宣帝高洋(2) (附聲音版)

上期係引子，今期正式講北齊文宣帝高洋嘅「癲史」：

高洋呢個人，我會用兩句說話形容佢：「清醒時英明神武，酒醉時瘋瘋癲癲。」呢個人無酒不歡，而且逢飲必醉。佢頭幾年做皇帝時頭腦尚算清醒，雖然手段殘忍，但國家總算治理得井井有條，佢帶兵打仗都有一手，連北齊勁敵北周領袖宇文泰都忌佢三份。但佢做皇帝做左5、6年後，飲酒愈嚟愈厲害，行為就愈怪異。

有一次，佢又發酒瘋，激到佢生母婁太后(資料1)作勢追打佢，邊打邊鬧：「英雄老豆(指高歡)出左個狗熊衰仔。」高洋順口還擊：「我將你呢個老太婆嫁比番鬼佬。」
史書上嘅原文係「即當嫁此老母與胡。」(資料2)呢句話非常侮辱，因為係漢人眼中胡人係低一等，但諗深一層又幾搞笑，佢阿媽婁太后真係胡人嚟，用依家嘅說話嚟講佢阿媽係真係一個「鬼婆」！
順帶一提，依家好多人覺得「老母」呢個詞語好粗俗，甚至聯想到粗口，呢個完全誤解，古書成日用「老母」一詞，表示年紀大嘅母親，可見廣東話保留好多古語，並唔係大家所想咁粗俗。
繼續講返高洋，自從上次嘅事件，婁太后就不苟言笑，高洋想辦法氹返阿媽，加上又飲大左，有一次佢捐入太后嘅床底舉起張床諗住引太后發笑，點知用力過猛，搞到太后跌左落床受咗傷。當佢酒醒之後知道大劑，竟然想跳入火堆一死謝罪，太后立即叫人拉住佢，仲同佢講你飲醉酒唔算不孝。(資料3)高洋唔肯罷休，同阿媽講死罪可免活罪難饒，即刻除衫要手下狠他自己，婁太后死抱住佢唔放，唔肯比自己乖仔受刑。
好啦，既然太后咁講就聽話唔比人狠打啦，但自己不孝係唔可以唔受懲罰，呢個「天才皇帝」立即諗到一種絕世刑罰：罰打腳板！史書上叫「笞腳」(資料4)。高洋比自己嘅刑罰相當重，共打50吓，究竟真打定假打，我地就無從判斷啦(資料5)。

高洋嘅「癲史」當然唔止咁少，下期再同大家分享！

文：老積

【資料來源】編者案：本工作室替老積先生的文稿補上資料來源，方便有興趣的讀者參考。

1. 婁太后名昭君，鮮卑人，因見高歡英武而叫婢女向高歡表達情意，這在古代是非常大膽的舉動，婁家不得已將她許配給高歡。事見《北齊書》〈列傳第1〉。

2. 事見《資治通鑑》卷166〈梁紀22〉。

3. 事見《資治通鑑》卷166〈梁紀22〉。

4. 事見《資治通鑑》卷166〈梁紀22〉。

5. 《資治通鑑》並無記述高洋的傷勢(見卷166〈梁紀22〉)，《北史》則說「笞腳五十，莫不至到」(見《北史》卷7〈本紀第7齊本紀〉)，即鞭打了五十，腳上傷痕累黑。究竟是真打假打，大家可自行判斷。

(聲音敘述)

二喬面書

二喬推特

二喬工作室網頁