中國古代行醫嘅人社會地位唔高，但醫術高明嘅醫師，例如大家熟悉嘅匾鵲、華佗、張仲景等大國手，都會深受世人尊崇。相反，一啲有才冇德嘅醫生，縱使你醫術幾高明，世人都會嗤之以鼻。
今日老積為大家介紹一位北齊名醫，佢嘅名字叫徐之才。(資料1)大家睇完呢篇文章後，可以自行己評價呢位名醫，不過大家評還評，千祈唔好對號入座呀！
徐之才係南朝梁朝出生同成長，佢出身醫學世家，阿爸徐雄係南齊嘅名醫，弟弟徐之範亦係名醫，而徐之才嘅醫術更為出眾。
徐之才嘅醫術有幾犀利？老積用兩個例子都大家分享，有一個人經常腳踭腫痛，佢睇過唔少醫生都冇法治癒，後嚟搵咗徐之才睇病，徐之才問病人係唔係經常坐船，又習慣將雙腳放喺水中，病人答覆係確實如此。徐之才將病人嘅腳跟割開，找到兩粒細小嘅蛤(即哈唎，貝殼類)，估計係呢位病人長期將腳放入水中，有啲貝殼寄生咗喺腳裏面。千多年前，佢施行簡單嘅手術就醫好咗呢個人腳踭嘅毛病，都唔好話唔厲害。
第二個例子同武成帝高湛有關，高湛呢個人長期縱情酒色，搞到自己身體非常虛弱，徐之才用針藥將佢嘅病醫好，從此高湛對徐之才嘅醫術佩服得五體投地。
有啲嘢似乎係冥冥中整定嘅，閻王預咗位俾高湛，就算有神醫幫手都避唔到。徐之才經常討好武成帝寵臣和士開，喺和士開幫忙下，徐之才得以外放做大官。過咗無耐，武成帝舊病復發，老積估計係高湛再次縱容過度之故，當時嘅情況非常危急，高湛即刻派入急召徐之才回京，可惜一切嚟得太遲，皇帝喺徐之才抵達前一日已一命嗚呼。
好啦，我哋返轉頭睇吓徐之才其他嘅事蹟。徐之才除咗精通醫術外，佢又博通經史，對天文圖讖之學亦有一定認識。老積略為解釋吓，所謂圖讖，大致等同今日我哋所講嘅術數。
徐之才喺南朝嘅梁朝出生，年青時喺梁朝已薄有名氣。後嚟佢跟隨梁朝宗臣蕭綜投靠咗北魏，投靠北魏冇幾耐，魏國又分裂成東西魏。徐之才先後追隨東魏丞相高歡同佢個仔高洋，高洋就係老積曾多次提及嘅北齊開國癲佬皇帝啦。
可能徐之才屬梁朝嘅舊電池，佢為咗要討好高家呢班新主子，佢喺新主子面前落足鞋油擦鞋。當時高洋想篡位，但又害怕禪讓之後西魏宇文家族指責佢地犯上作亂，目無君上，當大家猶疑不決之際，徐之才用咗個比喻解決咗高氏家族嘅疑慮，佢咁講：「一千個人追逐一隻兔仔，當一個人追到牠，其他人自然會停手。」(資料2)徐之才所講嘅兔仔係指魏國政權，千人追逐表示好多人對呢個政權有興趣，但當高氏家族名正言順取代魏國之後，其他人自然唔會輕舉妄動。呢個比喻，令高洋決心取代東魏，建立新王朝北齊。
徐之才借一個生動比喻勸進高洋，無非係想喺新朝廷中扮演要角，佢並唔滿足自己高明嘅醫術，佢人生嘅目標係權位，所以佢對其他有權勢嘅人極力奉承。文宣帝高洋本來幾鍾意佢，可惜高洋嘅心腹楊愔認為佢係南朝嘅舊電池，想盡辦法抑制佢，所以佢喺高洋時代都係做一啲閒職。
到咗武成帝時，佢為求上位，全力諂媚皇帝身邊嘅寵臣和士開。徐之才嘅老婆係北魏廣陽王嘅妹妹，屬名門望族出身，和士開竟然姦淫咗佢，徐之才知道後，不特止冇嬲，仲同人講：「後生仔貪玩姐！」(資料3)
後主高緯即位，徐之才除咗諂媚和士開之外，又極力巴結後主奶媽陸令萱同佢個仔穆提婆。今次徐之才終於能成功爭取啦，後主升任佢做尚書令，仲封埋佢做郡王添。可惜好景不常，徐之才嘅靠山和士開被政敵所殺，後主任用盲人祖珽執政，祖珽唔鍾意徐之才，安排佢做太子太師之類嘅閒職，搞到呢位一代名醫不禁破口大罵。其實當時徐之才已70多80歲，但佢仍戀棧權位，可見權力呢樣嘢嘅誘惑實在太大，唔少人掂到就唔想放手。
順便講一件有趣嘅事，武成帝高湛有一次牙痛，原來佢口腔後面多生咗隻牙，於是佢問班太醫發生咩事，太醫鄧宣文如實報告，高湛發脾氣打咗佢一餐。後嚟高湛再問徐之才，徐之才嘅對答非常巧妙：「呢個係智牙，生呢種牙嘅人又聰明又長命。」(資料4)徐之才嘅擦鞋對答，令高湛條氣順晒。
「智牙」本來係擦鞋仔自創嘅詞語，估唔到竟然流傳甚廣，後世將智牙改稱成智慧牙、智慧齒，亦喺我哋依家慣常用嘅稱呼，或者呢樣嘢就係徐之才呢位北齊名醫一生中最大嘅貢獻啦。
1.
案：徐之才的事蹟見《北齊書》卷25〈列傳第25〉，下文不再列出處。
2.
原文：「千人逐兔，一人得之，諸人咸息。」(《北齊書》卷25〈列傳第25〉)
3.
原文：「妨少年戲笑。」(《北齊書》卷25〈列傳第25〉)
4.
原文：「此是智牙，生智牙者聰明長壽。」(《北齊書》卷25〈列傳第25〉)