唔知大家有冇留意香港醫生嘅資歷，原來唔少香港醫生喺蘇格蘭嘅愛丁堡大學皇家醫學院畢業(The Royal Infirmary of Edinburgh)，又有唔少醫生喺香港兩大畢業後到愛大醫學院進修。不熟知內情嘅人可能會有疑問，點解班醫生唔選擇英格蘭嘅大學而遠赴蘇格蘭進修？原來愛丁堡大學醫學院歷史悠久(成立於1729年)，醫學院嘅排名長居英國一、二位，遠遠拋離牛津、劍橋等知名學府，單係呢兩點，已可充分解釋香港醫生選擇喺愛大醫學院進修嘅原因。
愛大醫學院有唔少知名校友，例如《物種起源》作者達爾文(冇喺愛丁堡大學取得學位)、《福爾摩斯探案》作者柯南道爾、中國傳染病學專家鍾南山等。
鴉片戰爭前後，西方醫術開始傳入中國，惟行醫者悉數為外國人，大部分係受過西醫訓練嘅傳教士或一些隨商旅遠行嘅外國醫生，當時並無華人學習西方醫術。
 |
| 黃寬 |
黃寬嘅名字相信好少人聽過，但佢有一位鼎鼎大名嘅同學，就係首位美國耶魯大學(Yale University)嘅華人畢業生容閎，容閎後嚟回國，力主中國應向西方學習，並主張清廷應選派學生到美國留學而廣為人認識，後嚟容閎著有《西學東漸記》一書，其書對中國推行現代化影響深遠。
黃寬與容閎同就讀於澳門嘅馬禮遜學校(Morrison School)，黃還比容早一年入學。馬禮遜學校乃一所英國傳道會所辦嘅學校，學校其後由澳門遷往香港，其校長勃朗(Rev.Brown)乃美國人，佢喺1846年打算返回美國，臨離開前表示希望攜同三幾位學生到美國繼續升學。當時有三人願隨勃朗到美，容閎同黃寬就係其中二人。
到美後，容、黃入讀美國當時最著名嘅預備學校Monson Academy，兩入嘅成績均優異，容閎後嚟選擇喺美國升學，入讀美國著名學府耶魯大學，黃寬則選擇到蘇格蘭嘅愛丁堡大學讀醫。
據容閎《西學東漸記》所述，黃寬苦讀七年後，以第三名成績喺愛大醫學院畢業，並於1857年回廣東一帶行醫。容閎稱讚黃寬係好望角以東最負盛名嘅外科醫生(唔知有冇誇張)，又講佢係廣東行醫深受各方讚譽，旅居廣東嘅外國人信任佢多過外國嘅醫生，黃寬亦因為行醫而致富。黃寬喺1879年病逝，容閎咁樣評價佢呢位老同學：「其品行純篤，富有熱忱，故遺愛在人，不僅醫術工也。」
黃寬呢位對近代中國醫學有咁大貢獻嘅人，不但教科書唔會講佢嘅事跡，其他人嘅記述亦好少提到佢，講起嚟真係有啲可惜！
順帶一提，黃寬妻子乃香港牧師何福堂長女，後嚟兩人離異。
 |
| 愛丁堡大學今貌 |
文：老積
(聲音敘述)
二喬面書
二喬工作室相關資訊：
沒有留言:
張貼留言