地球上最多人講嘅語言唔係英文，但英語肯定係世界上最重要嘅語言，唔少嘅法律條文、貿易條款、學術論著等都係以英語為基礎。學吓英文，既可方便同英語世界嘅人溝通，又可同唔同地方嘅人做生意，甚至了解唔同嘅學術研究，學習英語實在百利無一害，難怪今時今日，唔同地方嘅人都會主動去學習英文。
話雖如此，時光倒流到百多年前嘅清朝，當時嘅社會絕對唔鼓勵大家學英文，甚至有啲人認為學英文係罪大惡極嘅事。咸豐皇帝時大學士倭仁明言冇文化嘅人先學「夷語」，呢位嚴守「夷夏之防」嘅老而不，順理成章將英文列作「夷語」，佢非常鄙視同文館出身，從外國人身上學懂外語嘅官員，並要求皇帝將呢班人驅逐出朝廷甚至繫獄。
喺咁嘅氛圍下，作為國家嘅領導人嘅皇帝主動要求學習英文係需要極大勇氣。據老積了解，清德宗光緒皇帝(愛新覺羅載湉)係第一個學英文嘅皇帝(溥儀係第二人)。從光緒學習英文一事可知，佢真係有心認識多啲外國嘅事物，從而改革清皇朝，可惜佢受慈禧太后掣肘同客觀環境影響，結果係壯志難酬！
 |
| 清德宗(光緒皇帝) |
光緒有兩位英文老師：張德彝同沈鐸，都係同文館出身。據說戊戌政變前，光緒非常用心學英文，文法方面學得唔錯，但口語則頗差勁。政變之後，光緒被軟禁，學習英語之事亦荒廢下來。
光緒兩位英文老師都係同文館出身，其中張德彝較為出名，佢係漢軍鑲黃旗人，15歲入同文館學習外語。同文館係洋務運動開始時設立嘅新機構，設立嘅目的係培養外語專才，以便將來同外國交涉以及認識外國新事物，清廷聘任外國傳教士任同文館導師。喺同文館畢業後，成績優異者可獲7-9品嘅官職。
 |
| 光緒帝英文老師張德彜 |
張德彝係首十名進入同文館嘅學生，佢專習英語，學習三年後經考核授予八品官職。出身同文館喺當時嚟講係極唔光采嘅事，原因上文已提及，當時嘅讀書人嚴守「夷夏之防」，學習外語等同背叛中華文化！除此之外，當時嘅人認為通過科舉登第作官才係正途，所以大部分官員都睇唔起呢班同文館出身嘅新晉官僚。
張德彝曾先後八次以清朝官員身份出使外國，足跡遍及歐美日。儘管張氏對自己並非科班出身而感到自卑，但多次嘅遊歷令佢眼界大開，佢亦勤於寫作，歷次出外均用日記記述，先後編成《航海述奇》、《航海再述奇》至《八述奇》(除咗《七述奇》散佚外，其餘七部仍保存完好)，呢七本書有助我哋了解百多年前中國人如何認識世界。
 |
| 《隨使法國記》是《航海述記》的一部分 |
文：老積
(聲音敘述)
沒有留言:
張貼留言