【影片簡介】
對很多香港人來說，愛丁堡大學的知名度不算高，但愛丁堡大學醫學院歷史悠久，名人輩出，而香港不少醫生都在愛大畢業及進修；第一位接受正統西醫訓練的華人黃寬亦是在該校畢業。影片為大家揭開這段鮮為人知的歷史。
【認識更多二喬工作室】
二喬工作室部落格(blog)相關資訊：
2023年11月20日 星期一
2023年11月9日 星期四
歷史教科書唔講：櫻花戰機(youtube版)
【影片簡介】
太平洋戰爭後期，日本敗象已呈，但日本軍方高層並不服輸，他們慫恿年輕人進行自殺式攻擊，最著名的就是神風特別攻擊隊(神風特攻隊)，結果令很多日本青年自願或不自願地犧牲性命。
戰爭後期，日本軍方還研發了一款非常邪惡的武器，這款武器有一個很美的名字：「櫻花戰機」。
究竟櫻花戰機如何邪惡，短片為大家揭開答案。
【認識更多二喬工作室】
二喬工作室部落格(blog)相關資訊：
2023年11月6日 星期一
歷史教科書唔講：最後一次神風攻擊(youtube版)
1945年8月15日，日本裕仁天皇宣佈無條件投降，與此同時，日本資深將領宇垣纏竟然違抗君令，私自發動最後一次神風攻撃。
這次無謂的行動能否成功？影片為大家揭開答案。
【認識更多二喬工作室】
二喬工作室部落格(blog)相關資訊：
2023年5月20日 星期六
歷史教科書唔講系列：最後一次神風攻擊(附聲音版)
 |
| 櫻花戰機：神風特攻隊在太平洋戰爭後期使用的其中一種機種 |
太平洋戰爭後期，日本敗象已呈，但日本人仍然唔服輸，佢哋派出神風特攻隊攻擊美軍戰艦，結果造成更多嘅傷亡。呢段歷史，相信好多人都知，老積冇謂多講啦。
但大家又知唔知最後一次神風攻擊發生喺邊段時間？答案係1945年8月15日日本時間16:00，發動者係日本海軍中將宇垣纏。當天宇垣中將帶領11架飛機從日本九州大分縣海軍基地出發，意圖攻擊沖繩外海嘅美軍戰艦。
心水清嘅朋友可能會問，1945年8月15日，日本裕仁天皇唔係已經喺全國播放「玉音」，宣佈日本接受波茨坦條約無條件投降咩，點解仲會有自殺攻擊？
老積想先講講大分呢個日本海軍基地，呢個係日本非常重要嘅海軍基地，太平洋戰爭後期，大分基地仲有一個非常重要任務，就係訓練神風特攻隊，當時唔少日本後生仔入伍當神風隊員，然後搭乘老舊戰機喺呢個基地出發攻擊美軍，從此一去冇回。
宇垣纏中將當時擔任九州防禦總指揮，當天皇中午宣佈無條件投降後，佢竟然下令手下嘅神風特攻隊作最後一次攻擊。原本佢命令5架飛機(每機2人)同行，但結果總共有11架飛機共22人(另一講法係23人)自願報名參與行動，攻擊者大部分係年青嘅神風隊員，宇垣並冇出手阻止佢哋。
宇垣率領嘅機隊飛到沖繩附近，美軍戰艦雷達發現呢批來歷不明嘅戰機，結果全數將佢哋擊落，最後一次神風任務可說徹底失敗。
呢廿幾個人原來唔係全部死晒，可能因為飛機太過老舊，其中2架起飛冇耐就因為機件故障而折返，機上4人得以倖存，另1架喺鹿兒島墜毀，1死1獲救。
講返宇垣纏，其實佢唔係等閒之輩，早喺1938年已晉升海軍少將，後嚟擔任聯合艦隊嘅參謀長，偷襲珍珠港佢有份向聯合艦隊總司令山本五十六出謀獻策。1943年山本乘飛機到所羅門群島視察，因為受到美軍伏擊而陣亡，同行嘅宇垣乘坐嘅飛機亦墜毀於海中，佢後嚟比日本海軍救起而大難不死。回國後宇垣升任海軍中將，戰爭後期擔任九州防禦總指揮，呢個係相當重要嘅職位，因為美軍攻取沖繩後，種種跡像顯示美軍會從九州登陸進佔日本本土，所以宇垣係擔負起死守九州嘅重要任務。
 |
| 宇垣纏中將 |
1945年8月15日，裕仁天皇已宣佈無條件投降，為何宇垣唔遵從天皇嘅指令呢？我哋試睇吓宇垣臨終嘅日記一段話，或者可了解呢個人嘅心態：
「……我指揮下的每個部隊都進行了勇猛的戰鬥，但我們沒有能力摧毀傲慢的敵軍，保護我們神聖的帝國，這是由本人缺乏能力而造成的。然而，相信帝國將永在，空軍特攻精神永存，我在飛往沖繩，那裏，我們的士兵曾像櫻花那樣失去了生命。我將撞入傲慢的美軍艦艇，體現真正的日本武士道精神……」
唔知大家點睇以上嘅一段話？老積就覺得宇垣纏呢個人非常自私，你自己要去殉國，切腹咪可以，事實上當年有唔少日本將領唔想投降選擇切腹自盡，雖然我唔認同佢哋侵略別人，用自己國民作賭注嘅做法，但佢哋忠於自己嘅信念而自盡，總算係光明磊落嘅好漢。至於呢位宇垣纏，明明佢「老頂」已宣佈停戰，但佢仍然想攻擊以前嘅敵人，仲搵埋啲後生仔去陪葬，呢種做法真係唔可以原諒。假如佢自己一個人去進行自殺攻擊，老積仲會話佢有啲人性，佢唔阻止其他人，甚至暗示其他人同佢一齊行動，真係無恥到極點。
仲有，從宇垣纏嘅故事，老積認為極端民族主義上腦，真係非常恐怖！
 |
| 神風特攻隊：大部分人從此一去不返 |
(聲音敘述)
【認識更多二喬工作室】
2023年4月16日 星期日
歷史教科書唔講系列：飛越瘋人院之癲佬帝國-智齒(北齊名醫徐之才)(附聲音版)
現代社會，醫生嘅社會地位好高，唔少人對醫生好崇敬，原因係見到醫生，我哋自然聯想到專業，亦會感激醫生治病救人，當然佢哋嘅豐厚收入，亦會令一般人非常羨慕。
中國古代行醫嘅人社會地位唔高，但醫術高明嘅醫師，例如大家熟悉嘅匾鵲、華佗、張仲景等大國手，都會深受世人尊崇。相反，一啲有才冇德嘅醫生，縱使你醫術幾高明，世人都會嗤之以鼻。
今日老積為大家介紹一位北齊名醫，佢嘅名字叫徐之才。(資料1)大家睇完呢篇文章後，可以自行己評價呢位名醫，不過大家評還評，千祈唔好對號入座呀！
徐之才係南朝梁朝出生同成長，佢出身醫學世家，阿爸徐雄係南齊嘅名醫，弟弟徐之範亦係名醫，而徐之才嘅醫術更為出眾。
徐之才嘅醫術有幾犀利？老積用兩個例子都大家分享，有一個人經常腳踭腫痛，佢睇過唔少醫生都冇法治癒，後嚟搵咗徐之才睇病，徐之才問病人係唔係經常坐船，又習慣將雙腳放喺水中，病人答覆係確實如此。徐之才將病人嘅腳跟割開，找到兩粒細小嘅蛤(即哈唎，貝殼類)，估計係呢位病人長期將腳放入水中，有啲貝殼寄生咗喺腳裏面。千多年前，佢施行簡單嘅手術就醫好咗呢個人腳踭嘅毛病，都唔好話唔厲害。
第二個例子同武成帝高湛有關，高湛呢個人長期縱情酒色，搞到自己身體非常虛弱，徐之才用針藥將佢嘅病醫好，從此高湛對徐之才嘅醫術佩服得五體投地。
有啲嘢似乎係冥冥中整定嘅，閻王預咗位俾高湛，就算有神醫幫手都避唔到。徐之才經常討好武成帝寵臣和士開，喺和士開幫忙下，徐之才得以外放做大官。過咗無耐，武成帝舊病復發，老積估計係高湛再次縱容過度之故，當時嘅情況非常危急，高湛即刻派入急召徐之才回京，可惜一切嚟得太遲，皇帝喺徐之才抵達前一日已一命嗚呼。
好啦，我哋返轉頭睇吓徐之才其他嘅事蹟。徐之才除咗精通醫術外，佢又博通經史，對天文圖讖之學亦有一定認識。老積略為解釋吓，所謂圖讖，大致等同今日我哋所講嘅術數。
徐之才喺南朝嘅梁朝出生，年青時喺梁朝已薄有名氣。後嚟佢跟隨梁朝宗臣蕭綜投靠咗北魏，投靠北魏冇幾耐，魏國又分裂成東西魏。徐之才先後追隨東魏丞相高歡同佢個仔高洋，高洋就係老積曾多次提及嘅北齊開國癲佬皇帝啦。
可能徐之才屬梁朝嘅舊電池，佢為咗要討好高家呢班新主子，佢喺新主子面前落足鞋油擦鞋。當時高洋想篡位，但又害怕禪讓之後西魏宇文家族指責佢地犯上作亂，目無君上，當大家猶疑不決之際，徐之才用咗個比喻解決咗高氏家族嘅疑慮，佢咁講：「一千個人追逐一隻兔仔，當一個人追到牠，其他人自然會停手。」(資料2)徐之才所講嘅兔仔係指魏國政權，千人追逐表示好多人對呢個政權有興趣，但當高氏家族名正言順取代魏國之後，其他人自然唔會輕舉妄動。呢個比喻，令高洋決心取代東魏，建立新王朝北齊。
徐之才借一個生動比喻勸進高洋，無非係想喺新朝廷中扮演要角，佢並唔滿足自己高明嘅醫術，佢人生嘅目標係權位，所以佢對其他有權勢嘅人極力奉承。文宣帝高洋本來幾鍾意佢，可惜高洋嘅心腹楊愔認為佢係南朝嘅舊電池，想盡辦法抑制佢，所以佢喺高洋時代都係做一啲閒職。
到咗武成帝時，佢為求上位，全力諂媚皇帝身邊嘅寵臣和士開。徐之才嘅老婆係北魏廣陽王嘅妹妹，屬名門望族出身，和士開竟然姦淫咗佢，徐之才知道後，不特止冇嬲，仲同人講：「後生仔貪玩姐！」(資料3)
後主高緯即位，徐之才除咗諂媚和士開之外，又極力巴結後主奶媽陸令萱同佢個仔穆提婆。今次徐之才終於能成功爭取啦，後主升任佢做尚書令，仲封埋佢做郡王添。可惜好景不常，徐之才嘅靠山和士開被政敵所殺，後主任用盲人祖珽執政，祖珽唔鍾意徐之才，安排佢做太子太師之類嘅閒職，搞到呢位一代名醫不禁破口大罵。其實當時徐之才已70多80歲，但佢仍戀棧權位，可見權力呢樣嘢嘅誘惑實在太大，唔少人掂到就唔想放手。
順便講一件有趣嘅事，武成帝高湛有一次牙痛，原來佢口腔後面多生咗隻牙，於是佢問班太醫發生咩事，太醫鄧宣文如實報告，高湛發脾氣打咗佢一餐。後嚟高湛再問徐之才，徐之才嘅對答非常巧妙：「呢個係智牙，生呢種牙嘅人又聰明又長命。」(資料4)徐之才嘅擦鞋對答，令高湛條氣順晒。
「智牙」本來係擦鞋仔自創嘅詞語，估唔到竟然流傳甚廣，後世將智牙改稱成智慧牙、智慧齒，亦喺我哋依家慣常用嘅稱呼，或者呢樣嘢就係徐之才呢位北齊名醫一生中最大嘅貢獻啦。
【資料來源】編者案：本工作室替老積先生的文稿補上資料來源，方便有興趣的讀者參考。
1.
案：徐之才的事蹟見《北齊書》卷25〈列傳第25〉，下文不再列出處。
2.
原文：「千人逐兔，一人得之，諸人咸息。」(《北齊書》卷25〈列傳第25〉)
3.
原文：「妨少年戲笑。」(《北齊書》卷25〈列傳第25〉)
4.
原文：「此是智牙，生智牙者聰明長壽。」(《北齊書》卷25〈列傳第25〉)
(聲音敘述)
【認識更多二喬工作室】
訂閱：
文章 (Atom)